ప్రపంచ దేశాలపై కరోనా మహమ్మారి పంజా విసురుతూనే ఉంది. చిన్న, పెద్ద, ధనిక, పేద తేడా లేకుండా చుట్టేస్తోంది. శనివారం ఉదయం నుంచి ఆదివారం వరకు 2.90 లక్షల కొత్త కేసులు నమోదయ్యాయి. 5వేల మందికిపైగా మరణించారు. మొత్తం కేసుల సంఖ్య 2 కోట్ల 90 లక్షలకు చేరువైంది. అయితే.. ఇప్పటి వరకు 2 కోట్ల 8 లక్షలకుపైగా వైరస్ నుంచి కోలుకోవటం ఊరట కలిగిస్తోంది. భారత్, అమెరికా, బ్రెజిల్, రష్యాలో వైరస్ ఉద్ధృతి ఎక్కువగా ఉంది.
మొత్తం కేసులు: 28,940,197
మరణాలు: 924,569
కోలుకున్నవారు: 20,807,024
యాక్టివ్ కేసులు: 7,208,604
- అమెరికాలో కొద్ది రోజులుగా 30 వేల లోపు కేసులు నమోదవుతూ తగ్గుముఖం పట్టినట్లు కనిపించినా.. మళ్లీ విజృంభిస్తోంది. శనివారం 40వేలకుపైగా కొత్తగా వైరస్ బారినపడ్డారు. మొత్తం కేసుల సంఖ్య 66.76 లక్షల దాటింది. మరణాల సంఖ్య 2 లక్షలకు చేరువైంది.
- బ్రెజిల్లో వైరస్ ఉద్ధృతి కొనసాగుతూనే ఉంది. శనివారం కొత్తగా 33,523 కేసులు నమోదయ్యాయి. 814 మంది వైరస్కు బలయ్యారు. వారం రోజుల్లోనే 6వేల మందికిపైగా ప్రాణాలు కోల్పోయారు. మొత్తం మరణాలు 1.31 లక్షలు దాటాయి.
- రష్యాలో కరోనా మహమ్మారి వేగంగా వ్యాపిస్తోంది. కేసుల పరంగా నాలుగో స్థానంలో ఉంది. మొత్తం కేసులు 10 లక్షలు దాటాయి. 18 వేలకుపైగా మరణించారు. 8.73 లక్షల మంది వైరస్ నుంచి కోలుకున్నారు.
- రష్యా తర్వాత ఐదో స్థానంలో ఉంది పెరూ. కేసులతో పాటు మరణాల సంఖ్యలోనూ పోటీ పడుతోంది. ఇప్పటి వరకు 7 లక్షలకుపైగా వైరస్ బారినపడగా 30వేల మందికిపైగా ప్రాణాలు కోల్పోయారు.
ప్రపంచవ్యాప్తంగా పలు దేశాల్లో కేసుల వివరాలు ఇలా..
| దేశం | కేసులు | మరణాలు |
| అమెరికా | 6,676,601 | 198,128 |
| బ్రెజిల్ | 4,315,858 | 131,274 |
| రష్యా | 1,057,362 | 18,484 |
| పెరు | 722,832 | 30,593 |
| కొలంబియా | 708,964 | 22,734 |
| మెక్సికో | 663,973 | 70,604 |
