పురుషులతో పోలీస్తే.. కొవిడ్-19 వల్ల తీవస్థాయి సమస్యలు, మరణం ముప్పు మహిళల్లోనే తక్కువని కెనడా శాస్త్రవేత్తలు పేర్కొన్నారు. అతివల్లో బలమైన రోగనిరోధక ప్రతిస్పందనను కలిగించే హార్మోన్లు, క్రోమోజోములు ఉండటమే ఇందుకు కారణమన్నారు. ఆల్బర్టా విశ్వవిద్యాలయానికి చెందిన గావిన్ క్విడిట్ నేతృత్వంలోని శాస్త్రవేత్తలు ఈ పరిశోధన చేశారు.
ఏసీఈ2 అనే ఒక ఎంజైమ్తో ముడిపడిన లింగపరమైన భేదాలను వారు శోధించారు. నిజానికి ఈ ఎంజైమ్..మానవ శరీరంలోకి వైరస్ ప్రవేశానికి వీలు కల్పించే ద్వారంలా పనిచేస్తుంది. ఇది గుండె, ఊపిరితిత్తులు, మూత్రపిండాల వ్యాధుల నుంచి రక్షించడంలోనూ కీలకంగా వ్యవహరిస్తోంది. ఏసీఈ-2 అనేది 'ఎక్స్' క్రోమోజోముతో ముడిపడిన జన్యువు. పురుషుల్లో ఈ క్రోమోజోము ఒక్కటే ఉంటుంది. మహిళల్లో రెండు ఉంటాయి. ఈ నేపథ్యంలో మహిళల్లో ఏసీఈ2కు సంబంధించిన జన్యువులు రెండు ఉంటున్నాయి. దీనివల్ల మహిళలకు కొవిడ్-19 ఇన్ఫెక్షన్ ముప్పు పెరగకపోగా.. వైరస్తో ముడిపడిన రుగ్మతల బారి నుంచి రక్షణ లభిస్తోందని శాస్త్రవేత్తలు పేర్కొన్నారు. పుట్టుకతో వచ్చే రోగనిరోధక వ్యవస్థలో కీలక భాగమైన 'టోల్-లైక్' రెసెప్టార్ సెవెన్ అనే భాగం కూడా మహిళల్లో రెట్టింపు స్థాయిలో బలంగా ఉంటుందని శాస్త్రవేత్తలు తెలిపారు. అందువల్లే అతివలు..వైరస్ ఇన్ఫెక్షన్ను మెరుగ్గా ఎదుర్కోగలుగుతున్నారని వివరించారు.
