అగ్రరాజ్యంలో 'బ్లాక్ లివ్స్ మేటర్' ఉద్యమం ఉవ్వెత్తున ఎగసిపడుతోంది. జార్జి ఫ్లాయిడ్ మృతికి నిరసనగా అమెరికా వ్యాప్తంగా నిరసనజ్వాలలు చెలరేగుతున్నాయి. ఇలాంటి తరుణంలో ఓ పోలీసు అధికారి అత్యుత్సాహం మరో ఫ్లాయిడ్ ఉదంతాన్ని కళ్లకు కట్టింది.
ఏమైంది..?
వర్జీనియా రాష్ట్రం ఫైర్ఫేక్స్ నగరంలో ఓ పోలీసు అధికారి ఓ నల్లజాతీయుడిపై స్టన్గన్ ఉపయోగించాడు. ఓ వ్యక్తి వీధుల్లో ఆక్సిజన్ కావాలని అరుస్తూ తిరుగుతున్నట్లు పోలీసులకు ఫోన్ వచ్చింది. అక్కడకు చేరుకున్న పోలీసులు సదరు నల్లజాతీయుడ్ని అంబులెన్స్ ఎక్కమన్నారు.
ఈ లోపు టైలర్ టింబర్లేక్ అనే తెల్లజాతీయుడైన పోలీసు అధికారి ఆ వ్యక్తిని కిందకు నెట్టి.. అతడి చేతులు వెనక్కి విరిచిపైన కూర్చొన్నాడు. వెంటనే స్టన్గన్ తీసి నల్లజాతీయుడి మెడపై కాల్పులు జరిపాడు. నొప్పిని తాళలేక ఆ వ్యక్తి అరవగా.. మళ్లీ కాల్చాడు.
ఈ దృశ్యాలు పోలీసు అధికారి బాడీ కెమెరాలో రికార్డయ్యాయి. సదరు పోలీస్ అధికారి తీరుపై తీవ్ర విమర్శలు వస్తున్నాయి. ఘటనను ఖండించిన ఉన్నతాధికారులు సదరు అధికారి నిబంధనలను అతిక్రమించినట్లు పేర్కొన్నారు. ఇలాంటి ఘటనలను ఎంతమాత్రం సహించేది లేదని స్పష్టం చేశారు. ఆ నల్లజాతీయుడ్ని ఆసుపత్రికి తరలించి చికిత్స అనంతరం విడుదల చేసినట్లు తెలిపారు.
