డబ్ల్యూహెచ్​ఓ చేతికి 2 బిలియన్ల టీకా డోసులు

వివిధ దేశాలకు కొవిడ్ టీకాలు త్వరితగతిన పంపిణీ చేసేందుకు తమ వద్ద 2 బిలియన్ల వ్యాక్సిన్లు ఉన్నాయని ప్రపంచ ఆరోగ్య సంస్థ తెలిపింది. 190 దేశాలకు టీకాలు పొందే అవకాశం కల్పిస్తున్నట్లు పేర్కొంది. ప్రపంచ ఆరోగ్య రంగం చరిత్రలో ఇదో మైలురాయని వెల్లడించింది.

అన్ని దేశాలకు కరోనా టీకా పంపిణీ చేయాలన్న తమ లక్ష్యంలో పురోగతి సాధించినట్టు ప్రపంచ ఆరోగ్య సంస్థ చీఫ్​ టెడ్రోస్​ అథనోమ్​ తెలిపారు. ఆశాజనకంగా ఉన్న టీకాలకు సంబంధించి.. దాదాపు 2 బిలియన్ల డోసులు సంస్థ వద్ద అందుబాటులో ఉన్నట్టు పేర్కొన్నారు. 'కొవాక్స్​' సహాయంతో వచ్చే ఏడాది తొలి భాగంలో 190 దేశాలకు వీటిని అందించే అవకాశమున్నట్టు స్పష్టం చేశారు. ప్రపంచ ఆరోగ్య రంగం విషయంలో ఇదో మైలురాయి అని అభివర్ణించారు.

కొవాక్స్​, ఇతర ఫార్మా సంస్థల అధికారులతో మీడియా సమావేశానికి హాజరయ్యారు టెడ్రోస్. ప్రపంచ ఆరోగ్యసంస్థ, కొవాక్స్​లో భాగస్వామ్యం ఉన్న ఇతర సంస్థలు టీకా పంపిణీ త్వరితగతిన జరిపేందుకు నిర్విరామంగా కృషి చేస్తున్నాయని అన్నారు. వైరస్​ వ్యాప్తిని అరికట్టడంలో ఈ టీకాలు మెరుగ్గా పనిచేస్తున్నాయని తెలిపారు. కరోనా త్వరలోనే అంతమైపోతుందని ఆశాభావం వ్యక్తం చేశారు.

ఈ టీకాల పంపిణీలో ఆస్ట్రాజెనికా, జాన్స​న్​-జాన్సన్​, భారత్​కు చెందిన సీరమ్​ మొదలైన సంస్థలు ఆరోగ్య సంస్థ ఒప్పందంలో భాగస్వాములుగా ఉన్నాయి. అయితే మోడెర్నా, ఫైజర్​, బయో ఎన్​టెక్ సంస్థలు ఇందులో భాగస్వాములుగా లేకపోవడం గమనార్హం.

ఇదీ చదవండి:మాపై మెరుపుదాడులకు భారత్ ప్రణాళిక: పాక్​