ఇరాన్పై మరిన్ని ఆంక్షలు విధిస్తున్నట్టు అమెరికా అధ్యక్షుడు డొనాల్డ్ ట్రంప్ తాజాగా ప్రకటించారు. ఈ కీలక ఆంక్షలు సోమవారం అమల్లోకి రానున్నాయి. అణ్వస్త్ర కార్యక్రమానికి స్వస్తి పలికితే ఇరాన్కు తాను మంచి స్నేహితుడిగా ఉంటానన్న కొన్ని గంటలకే నూతన ఆంక్షలను ప్రకటించారు ట్రంప్.
"సోమవారం ఇరాన్పై అదనపు ఆంక్షలు విధించనున్నాము. ఆంక్షల నుంచి ఇరాన్ బయటపడే రోజు కోసం ఎదురుచూస్తున్నా. అప్పుడు ఆ దేశం మళ్లీ సుసంపన్నంగా మారుతుంది. ఇది ఎంత త్వరగా జరిగితే అంత మంచిది."- డొనాల్డ్ ట్రంప్, అమెరికా అధ్యక్షుడు
సైనిక చర్య...
తమ గగనతలంలోకి అక్రమ చొరబడిందనే నెపంతో అమెరికా నిఘా డ్రోన్ను ఇరాన్ కూల్చివేసినప్పటి నుంచి ఇరుదేశాల మధ్య ఉద్రిక్తతలు మరింత తీవ్రమయ్యాయి. ఈ విషయంపై మండిపడ్డ ట్రంప్... ఇరాన్పై సైనిక చర్య చేపట్టే అంశాన్ని ఇంకా పరిశీలిస్తూనే ఉన్నామని తెలిపారు. సమస్య పరిష్కారం అయ్యే వరకు ఈ అంశం తమ ప్రాధాన్యాంశాల్లో ఉంటుందని హెచ్చరించారు.
150 మంది ఇరాన్ ప్రజలు ప్రాణాలు కోల్పోతారనే కారణంగానే గురువారం చేపట్టాలని భావించిన సైనిక చర్యను నిలిపివేశానని ట్రంప్ తెలిపారు.
"150 మంది ఇరాన్ ప్రజలను చంపాలని నేను కోరుకోవడం లేదు. అవసరమైతే తప్ప ఎవరినీ చంపడానికి నేను ఇష్టపడను." -డొనాల్డ్ ట్రంప్, అమెరికా అధ్యక్షుడు
ఇరాన్ నిరసన..
30 మంది ప్రయాణిస్తున్న యూఎస్ నిఘా విమానాన్ని కూల్చకూడదని ఇరాన్ సైన్యం తీసుకన్న నిర్ణయాన్ని అభినందనిస్తున్నట్టు ట్రంప్ వెల్లడించారు. అయితే తమ నిఘా డ్రోన్ అంతర్జాతీయ గగనతలంలో ఉన్నప్పుడే ఇరాన్ కూల్చివేసిందని ట్రంప్ పునరుద్ఘాటించారు.
అమెరికా డ్రోన్లను ప్రయోగించడానికి అనుమతించాలని నిర్ణయం తీసకున్న పొరుగు అరబ్ దేశంపై ఇరాన్ ఆగ్రహం వ్యక్తం చేసింది. యూఏఈ ప్రతినిధిని టెహ్రాన్కు పిలిపించి నిరసన వ్యక్తం చేసింది. ఈ నేపథ్యంలో ఇరాన్పై సైనిక చర్య అంశాన్ని ట్రంప్ లేవనెత్తారు.
ఇరాన్ దూకుడుగా వ్యవహరిస్తుండటం వల్ల యుద్ధం జరిగే అవకాశముందని ప్రపంచ దేశాలు ఆందోళన చెందుతున్నాయి.
ఇదీ చూడండి: ఇరాన్ నిఘా కేంద్రాలపై అమెరికా సైబర్ దాడి
