'అమెరికాలో సంక్షోభం సృష్టించేందుకు రష్యా ప్రయత్నం'

అధ్యక్ష ఎన్నికల ముందు అమెరికాలో సంక్షోభం సృష్టించేందుకు రష్యా నిఘా సంస్థలు ప్రయత్నిస్తున్నాయని అగ్రరాజ్యం ఆరోపిస్తోంది. కొన్ని వెబ్​సైట్లలో కరోనా వైరస్​కు సంబంధించి తప్పుడు ప్రచారాలను చేస్తున్నాయని వెల్లడించింది. కరోనాను ఎదుర్కొనేందుకు అమెరికాకు రష్యా సాయం అందించినట్లు ఈ కథనాల్లో ఉందని అమెరికా ప్రభుత్వ వర్గాలు తెలిపాయి.

కరోనా వైరస్​కు సంబంధించి రష్యా నిఘా అధికారులు తప్పుడు సమాచారాన్ని వ్యాప్తి చేస్తున్నారని అమెరికా ఆరోపించింది. నవంబర్​లో జరిగే అధ్యక్ష ఎన్నికల ముందు అమెరికా ఎదుర్కొంటున్న సవాళ్ల నుంచి సంక్షోభం సృష్టించేందుకు ప్రయత్నిస్తున్నారని స్పష్ట చేసింది.

రష్యా సైనిక నిఘా సంస్థ 'జీఆర్​యూ'కు చెందిన ఇద్దరు సీనియర్ అధికారులు ఈ తప్పుడు ప్రచారానికి బాధ్యులుగా గుర్తించినట్లు అమెరికా ప్రభుత్వ వర్గాలు వెల్లడించాయి. తప్పుడు ప్రచారాలకు సంబంధించి అమెరికా ముందే గుర్తించినా.. పూర్తి వివరాలను తెలుసుకునేందుకు నిశబ్దంగా ఉన్నట్లు తెలిపాయి.

అమెరికా స్థాయిని తగ్గించేలా..

మే- జులై మధ్య మొత్తం మూడు ఇంగ్లీష్ వెబ్​సైట్లలో సుమారు 150 కథనాలు ప్రచురితమయ్యాయి. మహమ్మారి స్పందన విషయంలో రష్యాను ఆకాశానికెత్తేస్తూ.. అమెరికా స్థాయిని తగ్గించేలా ఈ కథనాలు ఉన్నాయని అధికారవర్గాలు తెలిపాయి.

రాజకీయాలే కాకుండా అమెరికా ప్రస్తుతం ఎదుర్కొంటున్న ప్రధాన సవాళ్లు కరోనా, జాత్యాంహకార నిరసనలే లక్ష్యంగా ఈ కథనాలు ఉన్నట్లు తెలుస్తోంది. కరోనా మహమ్మారిని ఎదుర్కొనేందుకు అమెరికాకు రష్యా ఆర్థిక సాయం అందించిందని, కొవిడ్​- 19 జీవాయుధమని చైనా భావిస్తోందని ఇందులోని కొన్ని కథనాల సారాంశమని వెల్లడించాయి.

ఇదీ చూడండి: భారతీయులకు సారీ చెప్పిన ఆ దేశ ప్రధాని కుమారుడు