'ఇరాన్​తో ముప్పు.. అందుకే బలగాల మోహరింపు'

మధ్యప్రాచ్యంలో మరిన్ని బలగాలను మోహరించేందుకు అమెరికా ఆదేశాలు జారీ చేసింది. ఇరాన్​తో ముప్పు పొంచి ఉన్నందుకే ఈ నిర్ణయం తీసుకున్నట్టు తెలిపింది అగ్రరాజ్యం. అమెరికా చర్యలు ప్రపంచ శాంతికి విఘాతమని ఇరాన్​ ఆరోపించింది.

ఇరాన్​తో ముప్పు పొంచి ఉందని ఆరోపిస్తూ మధ్యప్రాచ్యం(మిడిల్​ ఈస్ట్​)లో అదనపు బలగాలను మోహరించేందుకు అమెరికా నిర్ణయం తీసుకుంది. సర్వసన్నద్ధులైన 1500మంది రక్షణ సిబ్బందిని మధ్య ప్రాచ్యానికి పంపేందుకు ఆదేశాలు జారీ చేసింది. అమెరికా చర్యలను ఇరాన్​ ప్రభుత్వం తప్పుబట్టింది.

"మధ్యప్రాచ్యంలో అమెరికా ఉనికి పెరగడం అంతర్జాతీయ శాంతికి విఘాతం. గల్ఫ్ దేశాల్లో భద్రత మరింత దిగజారే అవకాశం ఉంది"

-మహ్మద్ జావెద్, ఇరాన్ విదేశాంగ మంత్రి

తమ ఆస్తులను ధ్వంసం చేసేందుకు ఇరాన్ ప్రయత్నిస్తోందన్న అనుమానాలతోనే తాజా నిర్ణయం తీసుకుంది అమెరికా. ఇప్పటికే అబ్రహం లింకన్​ యుద్ధ నౌక, బీ-52 శ్రేణి బాంబర్లను ఇరాన్​ లక్ష్యంగా పంపింది. ఇరాన్ బద్ధ శత్రువైన సౌదీ అరేబియాకు కాంగ్రెస్ ఆమోదం లేకుండానే ఆయుధాలు విక్రయించేందుకు ప్రణాళికలు రచిస్తోంది.
కొంత కాలంగా ఇరాన్​, అమెరికా మధ్య ఉద్రిక్తతలు నెలకొన్నాయి. 2015 అణుఒప్పందం నుంచి అమెరికా స్వచ్ఛందంగా వైదొలగిన అనంతరం ఈ పరిస్థితులు మరింత తీవ్రమయ్యాయి. ఇరాన్​పై మరిన్ని ఆంక్షలు విధిస్తూ అమెరికా నిర్ణయం తీసుకుంది. ఫలితంగా ఇరాన్​ ఆర్థిక వ్యవస్థ అస్తవ్యస్తంగా మారింది.

మధ్యవర్తిత్వానికి ఇరాక్ సిద్ధం

ఇరాన్ కోరితే అమెరికాతో సయోధ్య కుదిర్చేందుకు తాము సిద్ధంగా ఉన్నామని ఇరాక్ పార్లమెంట్ స్పీకర్ మహ్మద్ హల్​బౌసీ ప్రకటించారు. బాగ్దాద్​లో ఇరాన్ ఆర్థిక మంత్రి మహ్మద్ జావేద్ రెండు రోజుల పర్యటన సందర్భంగా ఈ వ్యాఖ్యలు చేశారు బౌసీ.

ఇదీ చూడండి: రయ్​రయ్​: సూపర్ కార్లన్నీ ఒకేచోటకు వస్తే...