మాస్కులు ధరించడంపై అమెరికన్లకు ఆ దేశ వ్యాధి నియంత్రణ, నిర్మూలన కేంద్రం(సీడీసీ) నూతన మార్గదర్శకాలను విడుదల చేసింది. కొవిడ్-19 రెండు డోసుల వ్యాక్సిన్ తీసుకున్న ప్రజలు మాస్కులు ధరించాల్సిన అవసరం లేదని స్పష్టం చేసింది. కరోనాతో నాడు అత్యంత దారుణంగా ప్రభావితమైన అమెరికా.. సాధారణ పరిస్థితులవైపు శరవేగంగా అడుగులు వేస్తోందనడానికి ఇదే నిదర్శనం.
నూతన మార్గదర్శకాలు ఇలా..
- ఫైజర్, మోడెర్నా, జాన్సన్ అండ్ జాన్స్, ఆస్ట్రాజెనెకా టీకా తీసుకున్న వారికే ఈ మార్గదర్శకాలు వర్తిస్తాయి.
- వ్యాక్సిన్ తీసుకోకపోయినా, పూర్తిస్థాయిలో వ్యాక్సినేషన్ పొందక పోయినా మాస్కు ధరించాల్సిందే.
- టీకా రెండో డోసు తీసుకున్న రెండు వారాల తర్వాత మాస్కులు తీసేయవచ్చు.
- రాష్ట్రాలు నిబంధనలు విధిస్తే వాటిని పాటించాలి. నిబంధనలు లేకపోతే భౌతిక దూరం కూడా అవసరం లేదు.
- ప్రయాణాలకు ముందు, ఆ తర్వాత కొవిడ్ పరీక్షలు చేయించుకోనవసరం లేదు.
- ప్రయాణం తర్వాత క్వారంటైన్, హోంక్వారంటైన్ అవ్వాల్సిన అవసరం లేదు.
బైడెన్ హర్షం..
సీడీసీ ప్రకటనపై అధ్యక్షుడు జో బైడెన్ హర్షం వ్యక్తం చేశారు. అమెరికన్లకు వ్యాక్సిన్లను శరవేగంగా అందిస్తుండటం వల్లే ఈ మైలురాయి సాధ్యమైందనని పేర్కొన్నారు. 114 రోజుల్లో 25కోట్ల వ్యాక్సిన్ డోసులు అందించామని వెల్లడించారు.
"ఇదొక గొప్ప రోజు. ఇదొక గొప్ప మైలురాయి. టీకా తీసుకున్న ప్రజలు మాస్కులు వేసుకోవాల్సిన అవసరం లేదు. 49 రాష్ట్రాల్లో కేసులు తగ్గుముఖం పట్టాయి. గతేడాది ఏప్రిల్ నాటితో పోలిస్తే మరణాల శాతం 80శాతం తగ్గింది. నాలుగు నెలల వ్యవధిలో పెద్దలకు వ్యాక్సిన్లు అందించడంలో 5.5శాతం నుంచి 60 శాతానికి చేరుకున్నాము. ఆర్థిక వ్యవస్థ కూడా గత 40ఏళ్లలో లేని విధంగా పుంజుకుంటోంది. ఉపాధి అవకాశాలు కూడా మెరుగయ్యాయి."
-జో బైడెన్, అమెరికా అధ్యక్షుడు
ఇదీ చూడండి:- అమెరికాలో తగ్గిన నిరుద్యోగుల సంఖ్య!
