మూడు దశాబ్దాల క్రితం గ్రీన్లాండ్లో అత్యంత కనిష్ఠ ఉష్ణోగ్రత నమోదైనట్లు ప్రపంచ వాతావరణ సంస్థ(డబ్ల్యూఎంఓ) తెలిపింది. ఉత్తరార్ధ గోళంలో రికార్డయిన కనిష్ఠ ఉష్ణోగ్రత ఇదేనని తెలిపింది. 1991 డిసెంబర్ 22న 'క్లింక్' ప్రాంతంలో ఉన్న వాతావరణ కేంద్రం వద్ద -69.6 డిగ్రీల సెల్సియస్ ఉష్ణోగ్రత నమోదైనట్లు ధ్రువీకరించింది. గ్రీన్లాండ్ మంచు ఫలకలోని ఎత్తైన ప్రాంతానికి సమీపంలోనే క్లింక్ ప్రదేశం ఉన్నట్లు పేర్కొంది.
తాజా ఉష్ణోగ్రతతో రష్యాలోని ఒయిమికోన్లో ఇదివరకు నమోదైన రికార్డు బద్దలైంది. ఈ ప్రాంతంలో 1897, 1993లో -67.8 డిగ్రీల సెల్సియస్ ఉష్ణోగ్రత నమోదైంది.
"వాతావరణ మార్పులు జరుగుతున్న ప్రస్తుత పరిస్థితుల్లో మన దృష్టంతా అధిక ఉష్ణోగ్రతల రికార్డులపైనే ఉంది. తాజాగా గుర్తించిన శీతల ఉష్ణోగ్రత వివరాలు.. భూమి మీద ఉన్న వైరుద్ధ్య పరిస్థితులను జ్ఞాపకానికి తెస్తోంది."
-ప్రొఫెసర్ పెట్టేరీ తాలస్, డబ్ల్యూఎంఓ ప్రధాన కార్యదర్శి
క్లింక్లో నమోదైన ఈ ఉష్ణోగ్రతను డబ్ల్యూఎంఓ తరఫున పనిచేసే క్లైమేట్ డిటెక్టివ్స్ గుర్తించారు. ఉష్ణోగ్రతలతో పాటు, అత్యధిక వర్షపాతం, వడగండ్ల వానలు, సుదీర్ఘ కాలంపాటు ఏర్పడిన మెరుపులు వంటి రికార్డులను గుర్తించేందుకూ వీరు ప్రయత్నిస్తున్నారు.
తాజా రికార్డు ఉత్తరార్ధ గోళానికి సంబంధించినది కాగా.. భూగోళంపై అత్యంత కనిష్ఠ ఉష్ణోగ్రత అంటార్కిటికాలో నమోదైంది. 1983లో వోస్తోక్ వాతావరణ కేంద్రం వద్ద -89.2 డిగ్రీల సెల్సియస్ ఉష్ణోగ్రత రికార్డయింది.
