"భారత్​కు ట్రంప్​ బెదిరింపు"

'భారత్​ అధిక సుంకాల దేశం' అని ఆరోపించారు అమెరికా అధ్యక్షుడు డొనాల్డ్​ ట్రంప్​. ఆ దేశం నుంచి అమెరికా దిగుమతి చేసుకునే వస్తువుల పైనా సుంకం వసూలు చేసే దిశగా యోచిస్తున్నట్లు ట్రంప్ హెచ్చరించారు.

చైనాతో వాణిజ్య యుద్ధ వాతావరణం సద్దుమణగకముందే... భారత్​ పై సుంకాల బాంబు పేల్చారు అమెరికా అధ్యక్షుడు డొనాల్డ్​ ట్రంప్​.
భారత్​ నుంచి అమెరికా దిగుమతి చేసుకునే వస్తువులపై సుంకం విధిస్తామని హెచ్చరించారు. 'భారత్ అధిక సుంకాల దేశం' అని ఆరోపించారు ట్రంప్​.

'అమెరికా వస్తువులపై భారత్ 100 శాతం సుంకం విధిస్తోంది. అక్కడి నుంచి దిగుమతి చేసుకునే వస్తువులపై అమెరికా విధిస్తోన్న సుంకం శాతం సున్నా. మేం తెలివితక్కువ వాళ్లం అనుకుంటున్నారా?. అమెరికా వస్తువులపై సుంకాలు తగ్గించాలి. లేదంటే పరస్పర పన్ను(రెసిప్రోకల్​ ట్యాక్స్​) లెక్కన భారత్​ వస్తువులపైనా వంద శాతం సుంకం విధించేందుకు వెనకాడబోం ' -- డొనాల్డ్​ ట్రంప్​, అమెరికా అధ్యక్షుడు

కన్సర్వేటివ్ పొలిటికల్ యాక్షన్ కాన్ఫరెన్స్ (సీపీఏసీ) సమావేశం చివరిరోజున ఈ వ్యాఖ్యలు చేశారు ట్రంప్​.

భారత్​-అమెరికా మధ్య ఉన్న వ్యాపార, పెట్టుబడుల విధి విధానాల్లో కీలక మార్పులు చేయాలని ట్రంప్ ప్రభుత్వం భావిస్తోంది. భారత వస్తువులపై ప్రస్తుతం ఉన్న సున్నా శాతం సుంకం నిబంధనను వెనక్కి తీసుకోవాలని గత నెల 6న నిర్ణయం తీసుకుంది.