భారత్-అమెరికా ద్వైపాక్షిక సంబంధాల బలోపేతానికి అగ్రరాజ్యం కీలక నిర్ణయం తీసుకోనుంది. ఈనెల 22న హ్యూస్టన్లో జరగనున్న 'హౌదీ-మోదీ' కార్యక్రమంలో భాగంగా భారత ప్రధాని నరేంద్ర మోదీ, అమెరికా అధ్యక్షుడు డొనాల్డ్ ట్రంప్ భేటీ కానున్నారు. ఈ వేదికపై భారత్కు అనుకూలంగా కీలక ప్రకటన చేయనున్నట్లు సంకేతాలిచ్చారు ట్రంప్.
ముఖ్యంగా గత కొంత కాలంగా ఇరుదేశాల మధ్య నెలకొన్న వాణిజ్య ఉద్రిక్తతలు, భారత్కు ప్రాధాన్యత గల దేశం హోదా (జీఎస్పీ) పునరుద్ధరణ వంటి అంశాలపైనే నిర్ణయం ఉండొచ్చని నిపుణులు అంచనా వేస్తున్నారు.
భారత ప్రధాని మోదీతో తనకు మంచి సంబంధాలు ఉన్నాయని తెలిపారు ట్రంప్. హౌదీ-మోదీ కార్యక్రమంలో ఏదైన ప్రకటన చేయబోతున్నారా అన్న ప్రశ్నకు సమాధానంగా కొన్ని ప్రకటనలు ఉంటాయని తెలిపారు. హౌదీ-మోదీ కార్యక్రమానికి తాను హజరవుతున్నట్లు ప్రకటించిన అనంతరం సమావేశానికి నమోదు చేసుకున్న వారి సంఖ్య మరింత పెరిగిందన్నారు.
సుమారు 50వేల మంది భారతీయ అమెరికన్లతో ఏర్పాటు చేస్తోన్న కార్యక్రమానికి ప్రత్యేక ఆహ్వానితులుగా హాజరవుతున్నారు ట్రంప్. ఒకే వేదికపై ట్రంప్, మోదీ భేటీ కావటం ఇదే తొలిసారి. కాగా మూడు నెలల వ్యవధిలో ఇరువురి మధ్య ఇది మూడో సమావేశం. ఇటీవల జపాన్లో జీ-20, ఫ్రాన్స్లో జీ-7 సదస్సుల వేదికగా భేటీ అయ్యారు.
భేటీకి ముందే..
హ్యూస్టన్లో మోదీ, ట్రంప్ల భేటీకి ముందుగానే ఇరుదేశాల అధికారులు వాణిజ్య ఒప్పందాన్ని పూర్తి చేసే అవకాశం ఉందని నిపుణులు అంచనావేస్తున్నారు. కొన్ని రోజుల క్రితం అమెరికా ఉత్పత్తులపై భారత్ అధిక సుంకాలు విధిస్తుందని ట్రంప్ ఆరోపించిన నేపథ్యంలో ఇరుదేశాల మధ్య వాణిజ్య ఉద్రిక్తతలు నెలకొన్నాయి. ఇరుపక్షాలు సుంకాలు పెంచాయి. అనంతరం భారత్కు వాణిజ్య ప్రాధాన్య హోదా (జీఎస్పీ)ను తొలగించారు ట్రంప్.
