అమెరికా మాజీ అధ్యక్షుడు డొనాల్డ్ ట్రంప్.. తన మద్దతుదారులను కొవిడ్ టీకా తీసుకోవాలని కోరారు. వ్యాక్సిన్ తీసుకునేందుకు ఎక్కువ మంది రిపబ్లికన్లు విముఖత చూపుతున్న నేపథ్యంలో అమెరికా మాజీ అధ్యక్షుడు ఈ వ్యాఖ్యలు చేయడం ప్రాధాన్యం సంతరించుకుంది.
"అందరూ కొవిడ్ టీకా తీసుకోవాలని నేను కోరుతున్నా. ముఖ్యంగా ఎన్నికల్లో నాకు ఓట్లు వేసిన వారు తప్పకుండా వ్యాక్సిన్ తీసుకోండి. ఇది చాలా మంచి టీకా. సురక్షితమైంది. సమర్థంగా పనిచేస్తుంది కూడా."
-డొనాల్డ్ ట్రంప్, అమెరికా మాజీ అధ్యక్షుడు.
ఓ న్యూస్ ఛానల్కు ఇంటర్యూ ఇచ్చిన ట్రంప్... అమెరికా ఆహార, ఔషధ నియంత్రణ సంస్థ-ఎఫ్డీఏ, ఫార్మా సంస్థలు కొవిడ్ టీకాను అభివృద్ధి చేసేందుకు నిరంతరం శ్రమిస్తున్నాయని అన్నారు. చమురు ధరల పెంపు, సరిహద్దుల అంశానికి సంబంధించి అధ్యక్షుడు జో బైడెన్పై విమర్శలు గుప్పించారు.
డొనాల్డ్ ట్రంప్ మద్దతుదారుల్లో 47 శాతం మంది టీకా తీసుకునేందుకు నిరాకరిస్తున్నట్లు ఇటీవలే ఓ సర్వేలో వెల్లడైంది. ఈ నేపథ్యంలో ట్రంప్ వ్యాఖ్యలు కీలకంగా మారాయి.
ఇదీ చదవండి:అంచనాలు లేకుండానే అమెరికా-చైనా చర్చలు!
