అమెరికా క్యాపిటల్లో జరిగిన హింసను అ దేశాధ్యక్షుడు డొనాల్డ్ ట్రంప్ ఖండించారు. ఈ విషయంపై అందరు అమెరికన్లలాగే తానూ ఆగ్రహానికి గురైనట్టు వెల్లడించారు. ఈ మేరకు ఓ వీడియో సందేశాన్ని విడుదల చేశారు.
"అందరు అమెరికన్లలాగే.. జరిగిన హింసాకాండపై నేనూ ఆగ్రహానికి గురయ్యాను. క్యాపిటల్ భవనాన్ని భద్రపరిచి, నిరసనకారులను బయటకి పంపించేందుకు తక్షణమే నేషనల్ గార్డ్స్ను మోహరించాను. అమెరికా ఎప్పుడూ శాంతిభద్రతలకు కట్టుబడి ఉంది. భవిష్యత్తులోనూ అలాగే ఉంటుంది."
--- డొనాల్డ్ ట్రంప్, అమెరికా అధ్యక్షుడు.
అయితే క్యాపిటల్ భవనంలో హింసకు పాల్పడే విధంగా తన మద్దతుదారులను ట్రంప్ ప్రరేపించారని వస్తున్న ఆరోపణలపై మాత్రం ఆయన ఎటువంటి ప్రకటన చేయలేదు.
మరోవైపు అధికార బదిలీకి తాను సహకరిస్తానని పునరుద్ఘాటించారు ట్రంప్. ఈ నెల 20 అధ్యక్షుడిగా జో బైడెన్ ప్రమాణస్వీకారం చేస్తున్న నేపథ్యంలో.. పద్ధతి ప్రకారం, ఎలాంటి ఆటంకం కలగకుండా అధికార బదిలీ జరుగుతుందని పేర్కొన్నారు.
జో బైడెన్ను అధ్యక్షుడిగా ధ్రువీకరించేందుకు బుధవారం సమావేశమైంది కాంగ్రెస్. ఈ సమయంలో ట్రంప్ మద్దతుదారులు వేలాది సంఖ్యలో క్యాపిటల్ భవనానికి చేరుకుని బీభత్సం సృష్టించారు. పరిస్థితిని అదుపుచేసేందుకు తీవ్రంగా శ్రమించారు అధికారులు. ఈ నేపథ్యంలో నలుగురు ప్రాణాలు కోల్పోయారు. ఈ ఘటనకు డొనాల్డ్ ట్రంప్ బాధ్యత వహించాలని బైడెన్ సహా అనేక మంది నేతలు తేల్చిచెప్పారు.
ఇదీ చూడండి: 'రాజ్యాంగంపై ట్రంప్ నిరంతర దాడికి పరాకాష్ఠ'
