గుమ్మం దాటితే చాలు.. ఎక్కడ చూసినా మాస్క్లు ధరించిన ముఖాలే దర్శనమిస్తున్నాయి. మాస్క్ లేకపోతే కనీసం జేబు రుమాలైనా కట్టుకుని తిరుగుతున్నారు. ఇంతలో ఎంత మార్పు.. ఏం తంటా తెచ్చిపెట్టావే కరోనా! అనుకుంటున్నారంతా.
కానీ కరోనా నుంచి కూడా ఆయనకు మినహాయింపు ఉంది. ఆయనే అమెరికా అధ్యక్షుడు డొనాల్డ్ ట్రంప్. 'మాస్కా.. నేను ధరించను. నాకవసరం లేదు..' అని ఇప్పటికే పలుమార్లు తెగేసి చెప్పారు ఆయన. కానీ ట్రంప్ మాస్క్ ధరిస్తే చూద్దామని ప్రజలు... క్లిక్ మనిపించి చూపిద్దామని విలేకర్లు ఆయన వెనుక తిరుగుతూనే ఉన్నారు. కానీ ఇప్పటివరకు ఆ దృశ్యం కనపడిందే లేదు.
అయితే ట్రంప్ తానే స్వయంగా మాస్క్ ధరించానని ఒప్పుకున్నారు. గురువారం మిషిగాన్ రాష్ట్రంలోని ఫోర్డ్ కర్మాగారాన్ని సందర్శించారు ట్రంప్. అనంతరం అక్కడి విలేకర్లతో మాట్లాడారు. ఆ సమయంలో విలేకర్లు మాస్క్ వేసుకున్నారా? అని అడగ్గా.. ట్రంప్ తనదైన రీతిలో సమాధానమిచ్చారు.
రిపోర్టర్: మీరు మాస్క్ వేసుకోకూడదని ఎందుకు నిర్ణయించుకున్నారు?
ట్రంప్: నేను ఇంతకుముందే మాస్క్ వేసుకున్నాను. కర్మాగారాన్ని చూడటానికి వెళ్లినప్పుడు ధరించాను. కానీ అది చూసే భాగ్యాన్ని మీడియాకు ఇవ్వను.
రిపోర్టర్: మీరు గాగుల్స్ కూడా ధరించారా?
ట్రంప్: అవును.. గాగుల్స్, మాస్క్ రెండూ ధరించాను. ఇక్కడ పెట్టుకోలేదు అంతే.
రిపోర్టర్: ఇక్కడ మాత్రం ఎందుకు పెట్టుకోలేదు?
ట్రంప్: అవసరం లేదు. ఇక్కడ అందరికీ పరీక్షలు జరిగాయి. నాకు జరిగాయి. నిజానికి.. నాకు ఉదయం కూడా కరోనా పరీక్ష చేశారు. కనుక మాస్క్ అవసరం లేదు. ధరించాలి అనుకునే వాళ్లు ధరించొచ్చు. అది వారి ఇష్టం. నేను లోపలకు వెళ్లినప్పుడు మాస్క్ పెట్టుకున్నా. చూడటానికి చాలా బాగుంది. ఇక్కడ అవసరం లేదు అని వాళ్లే అన్నారు.
రిపోర్టర్: ఇలా చేయడం వల్ల అమెరికన్లకు ఏం సందేశం వెళ్తుంది?
ట్రంప్: ఇది రెండు విధాలుగా వెళ్తుంది. వాళ్లు చెప్పారు. నేను మాస్క్ ధరించాను. ధన్యవాదాలు.
వెంటిలేటర్లు తయారు చేసే ఈ కర్మాగారం పర్యటనకు ట్రంప్ వచ్చినప్పుడు మాస్క్ ధరించి తీరాలని ఆ రాష్ట్ర అత్యున్నత న్యాయాధికారి ముందే చెప్పారు. లేకుంటే మరోసారి ట్రంప్ తమ రాష్ట్రానికి రాకుండా నిషేధం విధిస్తామని హెచ్చరించారు. అయినప్పటికీ ట్రంప్ మాస్క్ లేకుండానే కర్మాగారంలో తిరిగారు.
