యావత్ ప్రపంచాన్ని కరోనా మహమ్మారి అతలాకుతలం చేసింది. ఈ వైరస్ను నియంత్రించటంలో ఎన్నో దేశాలు విఫలమయ్యాయి. ఇందుకు అవినీతికి స్థానం ఉందని చెబుతోంది ఓ సర్వే. ఆయా దేశాల్లో అవినీతి బట్టే కరోనాపై స్పందన ఉందని పేర్కొంది.
అవినీతి అత్యల్పంగా ఉన్న దేశాలు కరోనా మహమ్మారితో ఎదురైన ఆర్థిక, వైద్య రంగ సవాళ్లను ఎదుర్కోవటంలో సఫలమైనట్లు పేర్కొంది అవినీతి వ్యతిరేక సంస్థ ట్రాన్పరెన్సీ ఇంటర్నేషనల్. 'కరప్షన్ పర్సెప్షన్ ఇండెక్స్- 2020' పేరిట నివేదిక విడుదల చేసింది. వివిధ రంగాల నిపుణులు, వ్యాపారవేత్తల సహకారంతో వివిధ దేశాల్లో అవినీతిపై సర్వే చేపట్టింది.
ప్రతి దేశానికి ఈ సంస్థ 0-100 మధ్య పాయింట్లను కేటాయించింది. 100 వస్తే అవినీతి రహిత దేశంగా, 0 వస్తే అవినీతిలో కూరుకుపోయిన దేశంగా పరిగణించింది.
" కొవిడ్-19 అనేది కేవలం ఆరోగ్య, ఆర్థిక సంక్షోభం మాత్రమే కాదు. అది అవినీతి సంక్షోభం. దానిని సరిగ్గా నిర్వహించటంలో విఫలమయ్యాం. ప్రపంచవ్యాప్తంగా అవినీతికి, కరోనా వైరస్పై స్పందనకు పెద్ద ఎత్తున సంబంధం ఉందని తేలింది. వైద్య సామగ్రి కొనుగోలుకు అవినీతి ప్రతిబంధకంగా మారింది "
- డేలియా ఫెర్రేయ్రా రుబియో, సర్వే అధినేత.
మరింత దిగజారిన అమెరికా..
అన్ని రంగాల్లోనూ అగ్రస్థానంలో ఉండే అమెరికాలో అవినీతి సూచీలో ఏటా తన స్థానాన్ని దిగజార్చుకుంటోంది. ఈ ఏడాది అమెరికాకు నూటికి 67 పాయింట్లు మాత్రమే దక్కాయి. ఈ సంఖ్య 2019లో 69, 2018లో 71, 2017లో 75గా ఉంది. ఈ ఏడాది అవినీతి సూచిలో చిలీతో సమానంగా 25వ స్థానంలో నిలిచింది. అమెరికాకు పాయింట్లు తగ్గడానికి ప్రధాన కారణం 2020లో ఆ దేశం ప్రకటించిన కొవిడ్ రిలీఫ్ ప్యాకేజీ అని సర్వే పేర్కొంది. కేవలం 1 ట్రిలియన్ డాలర్లు ప్రకటించడం పట్ల ప్రభుత్వ జవాబుదారీతనంపై అనుమానాలు వ్యక్తం అయ్యాయని తెలిపింది.
ఉరుగ్వే 21..బంగ్లాదేశ్ 146
ఉరుగ్వేకు ఏకంగా 71 పాయింట్లు వచ్చాయి. అవినీతి ఇండెక్స్లో 21వ స్థానంలో నిలిచింది. ఆరోగ్య రంగంలో భారీగా నిధులు కేటాయించటం వల్ల కరోనాతో పాటు జికా వైరస్, యెల్లో ఫీవర్ వంటి వాటిని సమర్థవంతంగా ఎదుర్కోగలిగిందని సర్వే తెలిపింది.
మరోవైపు.. బంగ్లాదేశ్కు 26 పాయింట్లే వచ్చాయి. జాబితాలో 146వ స్థానంలో నిలిచింది. కొవిడ్-19 సమయంలో దేశంలో అవినీతి భారీగా పెరిగిపోవటం వల్ల ఆరోగ్య రంగంపై చాలా తక్కువ ఖర్చు చేశారని పేర్కొంది సర్వే. అలాగే ఆరోగ్య కేంద్రాల్లో లంచాలతో నిరుపేదలకు సాయం అందటం లేదని తెలిపింది.
తొలిస్థానంలో న్యూజిలాండ్, డెన్మార్క్
న్యూజిలాండ్, డెన్మార్క్ దేశాలు సూచీలో 88 పాయింట్లతో 180 దేశాల జాబితాలో అగ్రస్థానం సంపాదించాయి. అయితే న్యూజిలాండ్లో మరింత పారదర్శకత అవసరమని తెలిపింది. ఈ రెండు దేశాలు సహా ఫిన్లాండ్, సింగపూర్, స్విట్జర్లాండ్, స్వీడన్, నార్వే, నెదర్ల్యాండ్స్, జర్మనీ, లక్సమ్బర్గ్ తొలి 10 స్థానాల్లో నిలిచాయి.
చివరి స్థానాల్లో ఆ రెండు దేశాలు..
చివరి స్థానాల్లో సోమాలియా, దక్షిణ సూడన్లు నిలిచాయి. ఈ దేశాలు 12 పాయింట్లతో 179వ స్థానంలో ఉన్నాయి. వీటి కన్నా కాస్త మెరుగైన స్థానాల్లో సిరియా, యెమెన్ , వెనీజులా, సుడన్, లిబియా, ఉత్తరకొరియా మొదలైన దేశాలు నిలిచాయి.
2012 నుంచి ఇప్పటివరకు 26 దేశాలు తమ స్థానాలు మెరుగుపరుచుకోగా, 22 దేశాలు తమ స్థానాలను దిగజార్చుకున్నాయి.
ఇదీ సంగతి : 'ముంబయిని కేంద్రపాలిత ప్రాంతం చేయండి'
