ముఖానికి మాస్కుల అవసరాన్ని నొక్కి చెప్పే మరో ప్రయోగ ఫలితాలు వెలుగులోకి వచ్చాయి. మనం సాధారణంగా మాట్లాడినా వెలువడే తుంపర్లు గాల్లో దాదాపు ఎనిమిది నిమిషాల పాటు ఉంటాయని పెన్సిల్వేనియా విశ్వవిద్యాలయంలోని 'ది నేషనల్‌ ఇన్‌స్టిట్యూట్‌ ఆఫ్‌ డయాబెటిస్‌ అండ్‌ డైజస్టివ్‌ అండ్‌ కిడ్నీ డిసీజ్‌' పేర్కొంది.
గాలి తక్కువగా ఉండే ఆసుపత్రులు, ఇళ్లు, క్రూజ్‌ షిప్‌లు వంటివి కరోనావైరస క్లస్టర్లుగా ఎందుకు మారుతున్నాయనే అంశంపై పరిశోధనలకు ఈ సమాచారం మరింత ఉపయోగపడుతుందని భావిస్తున్నారు. ఈ పరిశోధనలో వెలుగు చూసిన అంశాలను 'ది ప్రొసీడింగ్స్‌ ఆఫ్‌ నేషనల్‌ అకాడమీ ఆఫ్‌ సైన్సెస్‌' అనే జర్నల్‌లో ప్రచురించారు.
గట్టిగా మాట్లాడుతున్నప్పుడు ప్రతి క్షణం నోటి నుంచి వేలకొద్దీ తుంపరలు వెలువడుతున్నట్లు లేజర్‌ సాయంతో గుర్తించారు. వీటిల్లో వైరస్‌తో నిండిన తుంపరలు 1,000 గాల్లో ఎనిమిది నిమిషాలపాటు ఉంటున్నట్లు గ్రహించారు. దీంతో ఈ వైరస్ చిన్న తుంపరల నుంచి కూడా వ్యాపిస్తుందని అనుమానిస్తున్నారు. అసలు మాట్లాడినప్పుడు నోటినుంచి ఎన్ని చిన్న తుంపరలు వెలువడతాయి.. ఎంతసేపు గాల్లో ఉంటాయనే అంశాన్ని కనుగొనేందుకు ఈ పరిశోధన నిర్వహించారు.
