ఎడారి మధ్యలో ఏకశిలా స్తంభం.. ఎవరు పాతారు?

మనుషులెవ్వరూ తిరగని ఎడారి ప్రాంతం.. జనావాసాలకు చాలా దూరం.. అలాంటి ఆ ప్రదేశంలో ఓ పెద్ద ఏకశిలా స్తంభం కనిపించింది. దాన్ని అంతదూరం తీసుకువచ్చి పాతిన వారు ఎవరని ఇప్పుడక్కడ అందరూ తెగ చర్చించుకుంటున్నారు. ఇంతకీ ఆ ప్రదేశం ఎక్కడుందంటే..

అమెరికాలోని ఉటా నగరంలో ఎరుపురంగు కొండల (రెడ్​రాక్స్​) మధ్య బయటపడిన ఓ ఏకశిలా స్తంభం.. ఇప్పుడక్కడ చర్చనీయాంశంగా మారింది. జనావాసాల్లేని ఆ చోటులో స్తంభాన్ని ఎవరు పాతారోనని అందరూ తెగ మాట్లాడుకుంటున్నారు.

ఎలా బయటపడింది..

బిగ్​హార్న్​ షీప్​ అనే సంస్థ.. హెలికాప్టర్​లో సర్వే నిర్వహిస్తుండగా ఈ స్తంభం విషయం వెలుగులోకి వచ్చింది. దాన్ని పరిశీలించడానికి ఉటాకు చెందిన ప్రజా సంక్షేమ శాఖ, అటవీ వనరుల అధికారులు ప్రయత్నించారు. నవంబర్​ 18న ఆ వింత వస్తువు సమీపానికి చేరుకున్నారు. ఇద్దరు మనుషుల ఎత్తులో ఆ స్తంభం ఉన్నట్లు అధికారులు గుర్తించారు. కానీ, నిర్మానుష్య ప్రదేశమైన ఆ రెడ్​రాక్స్​ మధ్యకు దాన్ని ఎవరు తీసుకువచ్చారన్న దానిపై ఆధారాలను కనిపెట్టలేకపోయారు.

ప్రజలు ఆందోళన చెందుతారన్న ఉద్దేశంతో అధికారులు స్తంభం.. కచ్చితమైన చిరునామాను బహిర్గతం చేయలేదు. కానీ, అనుమతి లేకుండా ఈ కళాకృతిని రెడ్​రాక్స్​ మధ్యలో ఉంచడం అక్రమ చర్యగా అధికారులు పేర్కొన్నారు. ఈ విషయంపై భూ నిర్వహణ అధికారులు దర్యాప్తు జరపనున్నారని తెలిపారు.

ఇదీ చూడండి:మరో 60 ఉపగ్రహాలను ప్రయోగించిన స్పేస్​ఎక్స్​