తప్పుడు సమాచారంతో సామాజిక మాధ్యమాలు ప్రజలను చంపేస్తున్నాయని అమెరికా అధ్యక్షుడు జో బైడెన్ అన్నారు. కరోనా టీకాలపై ఫేస్బుక్లో దుష్ప్రచారం జరుగుతోందని, దీనిపై స్పందించాలని శ్వేతసౌధంలో ఓ విలేకరి కోరగా.. ఇలా స్పందించారు. టీకా తీసుకోనివారిలోనే మహమ్మారి వ్యాప్తి చెందుతోందని పేర్కొన్నారు.
టీకాపై అసత్య వార్తలు ప్రచారం కావడం పట్ల అమెరికా సర్జన్ జనరల్ వివేక్ మూర్తి గురువారమే ఆందోళన వ్యక్తం చేశారు. దీన్ని 'ఇన్ఫోడెమిక్'గా అభివర్ణించారు. వ్యాక్సిన్ల వల్లే కరోనా అదుపులోకి వచ్చిందని పేర్కొన్నారు. సామాజిక మాధ్యమాలు తప్పుడు వార్తలపై చర్యలు తీసుకోవాలని స్పష్టం చేశారు. లేదంటే ఇంకెంతో కాలం వేచి చూడకుండా.. తామే కఠిన చర్యలు తీసుకుంటామని హెచ్చరించారు.
'కచ్చితమైన సమాచారమూ చూస్తున్నారు'
అయితే, ఈ వ్యవహారంపై ఫేస్బుక్ ప్రతినిధి డానీ లీవర్ స్పందించారు. సరైన ఆధారాలు లేకుండా ఆరోపణలు చేస్తున్నారని పేర్కొన్నారు. నిజానికి ఫేస్బుక్లో కరోనా టీకాలపై కచ్చితమైన సమాచారాన్ని 200 కోట్ల మంది వీక్షించారని తెలిపారు. అంతర్జాలం మొత్తంలో ఇదే అత్యధికమని అన్నారు. టీకా ఎక్కడ లభిస్తుందనే వివరాలు వెల్లడించే 'వ్యాక్సిన్ ఫైండర్ టూల్'ను 33 లక్షల మంది అమెరికన్లు ఉపయోగించారని చెప్పారు. ప్రాణాలను కాపాడటంలో ఫేస్బుక్ ఎంతగానో సహాయపడుతోందని ఈ గణాంకాలతో స్పష్టమవుతోందని వివరించారు.
ఇదీ చదవండి: 'హబుల్ టెలిస్కోప్'పై నాసా కీలక ప్రకటన
