తీవ్రమైన కొవిడ్-19 లక్షణాలతో బాధపడే వారికి రక్త ఇన్ఫెక్షన్లు తోడైతే పరిస్థితి ఇంకా ప్రమాదకరంగా ఉంటుందని తాజా అధ్యయనంలో తేలింది. దీనివలన ఎక్కువ కాలం ఆస్పత్రిలో ఉండాల్సిన పరిస్థితి ఉత్పన్నమవుతుందని, ఆరోగ్యపరంగా చాలా సమస్యలు ఎదుర్కోవాల్సి ఉంటుందని రట్జర్స్ యూనివర్సిటీ శాస్త్రవేత్తలు తెలిపారు. మార్చి నుంచి మే మధ్యలో కొవిడ్-19 తీవ్రంగా ఉన్న 375 రోగులపై వీరు పరిశోధన చేశారు. ఇందులోంచి రక్త ఇన్ఫెక్షన్లు సోకిన 128 మంది నమూనాలను పరిశీలించారు.
"ఈ రోగుల్లో మానసికస్థితి మారిపోయింది. ఆక్సిజన్ స్థాయిలు తగ్గిపోయాయి. ఇంటెన్సివ్ కేర్ యూనిట్లో చేర్పించాల్సిన పరిస్థితి ఏర్పడింది" అని ఈ పరిశోధన పత్రం సహ రచయిత పింకీ భట్ తెలిపారు. ఈ రోగుల్లో మరణాల రేటు కూడా 50 శాతానికి మించి ఉందని వెల్లడించారు. వీరి పరిశోధన పత్రాన్ని 'ది జర్నల్ క్లినికల్ ఇన్ఫెక్షియస్ డిసీజెస్' ప్రచురించింది.
