టీకా ధ్రువపత్రాలను పరస్పరం గుర్తించుకోవాలి: మోదీ

కొవిడ్ మహమ్మారి ముప్పు ఇంకా తొలగిపోలేదని ప్రధానమంత్రి నరేంద్ర మోదీ వ్యాఖ్యానించారు. అనేక దేశాల్లో టీకా పంపిణీ జరగాల్సి ఉందన్నారు. (Modi US trip 2021) భారత్​లో టీకా ఉత్పత్తి పెరిగితే ప్రపంచ దేశాలకూ సరఫరా చేస్తామని చెప్పారు. ఇది వేగంగా జరిగేందుకు ట్రిప్స్ నిబంధనలను సడలించాలని కోరారు. మరోవైపు, టీకా ధ్రువీకరణ పత్రాలను పరస్పరం గుర్తించుకోవాలని మోదీ హితవు పలికారు. ఈ విషయంపై బ్రిటన్ వైఖరికి స్పందనగా ఈ వ్యాఖ్యలు చేశారు.

ప్రపంచాన్నంతటినీ భారతదేశం ఒకే కుటుంబంగా భావిస్తుందని ప్రధానమంత్రి నరేంద్ర మోదీ (PM Modi) పేర్కొన్నారు. (Modi US trip 2021) అమెరికా అధ్యక్షుడు జో బైడెన్ నిర్వహించిన గ్లోబల్ కొవిడ్ సమ్మిట్​లో (Covid Global summit) ప్రసంగించిన మోదీ.. కొవిడ్ మహమ్మారి ముప్పు ఇంకా తొలగిపోలేదని అన్నారు. ప్రపంచంలోని చాలా దేశాల్లో వ్యాక్సినేషన్ జరగాల్సి ఉందన్నారు. ఇలాంటి సమయంలో వ్యాక్సినేషన్​పై బైడెన్ తీసుకున్న చొరవను స్వాగతిస్తున్నట్లు తెలిపారు.

"మానవాళినంతటినీ భారత్ ఒకే కుటుంబంగా చూస్తుంది. భారత ఫార్మా రంగం తక్కువ ధరలో డయాగ్నోస్టిక్ కిట్లు, మందులు, మెడికల్ పరికరాలు, పీపీఈ కిట్లను తయారు చేసింది. అందుబాటు ధరల్లోనే వీటిని కొనుగోలు చేసేలా అభివృద్ధి చెందుతున్న దేశాలకు అవకాశం ఏర్పడింది. కరోనా సమయంలో మందులు, ఇతర సామాగ్రిని 150కు పైగా దేశాలకు పంపిణీ చేశాం. దేశీయంగా తయారు చేసిన రెండు టీకాలకు అత్యవసర అనుమతులు లభించాయి. ఇతర సంస్థలు సైతం టీకా తయారీలో నిమగ్నమయ్యాయి."

-నరేంద్ర మోదీ, భారత ప్రధానమంత్రి

ప్రపంచంలోనే అతిపెద్ద వ్యాక్సినేషన్ కార్యక్రమం (World's largest Vaccination drive) భారత్​లో కొనసాగుతోందని మోదీ పేర్కొన్నారు. ఇటీవల ఒకేరోజు 2.5 కోట్ల డోసులను పంపిణీ చేసినట్లు చెప్పారు. 20 కోట్ల మందికి పైగా భారతీయులు రెండు డోసులు తీసుకున్నారని, మొత్తంగా 80 కోట్లకు పైగా డోసులను పంపిణీ చేశామని వివరించారు. టీకా నిల్వలు పెరిగితే.. ఇతర దేశాలకూ పంపిణీ చేస్తామని తెలిపారు. ఈ సందర్భంగా ట్రిప్స్ నిబంధనల సడలింపు (Trips waiver WTO) అంశాన్ని ప్రస్తావించారు.

"భారత్​లో కొత్తగా టీకాలు అభివృద్ధి చెందిన కొద్దీ.. తయారీ సామర్థ్యాలను పెంచుతున్నాం. వ్యాక్సిన్ ఉత్పత్తి పెరిగితే ఇతర దేశాలకూ సరఫరా చేయగలుగుతాం. ఇందుకోసం ముడిసరుకుల సరఫరాను కొనసాగించాల్సి ఉంటుంది. ట్రిప్స్ నిబంధనలను సడలించాలని భారత్, దక్షిణాఫ్రికా.. డబ్ల్యూటీఓ ముందు ప్రతిపాదన ఉంచాయి. కొవిడ్​పై పోరాటాన్ని వేగవంతం చేసేందుకు ఇది ఉపయోగపడుతుంది."

-నరేంద్ర మోదీ, భారత ప్రధానమంత్రి

కరోనా మహమ్మారి వల్ల ఎదురయ్యే ఆర్థిక ప్రభావాలపైనా దృష్టిసారించాల్సిన అవసరం ఉందని మోదీ పేర్కొన్నారు. వ్యాక్సిన్ ధ్రువపత్రాలకు పరస్పర గుర్తింపునిచ్చుకుంటూ..అంతర్జాతీయ ప్రయాణాలను సులభతరం చేయాల్సిన ఆవశ్యకతను నొక్కిచెప్పారు. భారత్ జారీ చేసిన వ్యాక్సినేషన్ సర్టిఫికేట్​కు గుర్తింపుపై బ్రిటన్ సర్కారు నాన్చుడు ధోరణి పాటిస్తున్న నేపథ్యంలో పరోక్షంగా మోదీ ఈ వ్యాఖ్యలు చేశారు.

ఇదీ చదవండి: