కరోనా మహమ్మారి ప్రపంచవ్యాప్తంగా కల్లోలం రేపుతూనే ఉంది. 200లకుపైగా దేశాలు, చిన్న భూభాగాల్లో కలిపి ఆదివారం నాటికి దాదాపు కోటీ 46 లక్షలకుపైగా కేసులు నమోదయ్యాయి. 6 లక్షల మందికి పైగా మృతి చెందారు. జులై నెలలో రోజూ సగటున 2 లక్షలు దాటి కొత్త కేసులొస్తున్నాయి. అత్యధికంగా 24 గంటల్లో 2,54,381 కేసులు బయటపడినట్లు ప్రపంచ ఆరోగ్య సంస్థ వెల్లడించింది. టీకాలు వస్తే తప్ప సాధారణ జీవన పరిస్థితులు నెలకొనే అవకాశమే లేదని బ్రిటన్ శాస్త్రవేత్తలు గట్టిగా చెబుతున్నారు. ప్రపంచంలోనే అత్యధిక కేసులున్న అమెరికా, బ్రెజిల్, భారత్‌, రష్యాల్లో అదే స్థాయిలో ఉద్ధృతి కొనసాగుతోంది. పెద్ద దేశాలతో పాటు, పెరూ, చిలీ లాంటి చిన్న దేశాల్నీ వైరస్ కుదిపేస్తోంది. తాజాగా పెరూను వెనక్కినెట్టి దక్షిణాఫ్రికా ఐదో స్థానానికి చేరింది. ఎక్కువ మరణాలు నమోదవుతున్న దేశాల్లో అమెరికా, బ్రెజిల్, బ్రిటన్, మెక్సికో, ఇటలీలు మొదటి 5 స్థానాల్లో ఉండగా భారత్‌ 8వ స్థానంలో ఉంది.
- మొత్తం కేసులు: 14,640,375
- మొత్తం మరణాలు: 608,857
- కోలుకున్నవారు: 8,734,805
- యాక్టివ్ కేసులు: 5,296,713
ఏయే దేశాల్లో ఎలా..
అమెరికాలో..
అగ్రరాజ్యం అమెరికాలో మహమ్మారి ఉద్ధృతి ఆగడం లేదు. కేసులు, మరణాలూ ఇక్కడే ఎక్కువగా నమోదవుతున్నాయి. ఆదివారం నాటికి 38. 98 లక్షల కేసులు బయటపడగా.. 1.43 లక్షల మందికి పైగా ప్రాణాలు కోల్పోయారు. అత్యధికంగా న్యూయార్క్‌లో 4 లక్షల కేసులుండగా, 32 వేల మందికి పైగా ప్రాణాలు కోల్పోయారు. న్యూజెర్సీ, మసాచుసెట్స్‌, కాలిఫోర్నియా తదితర ప్రాంతాల్లోనూ మరణాలు ఎక్కువగా ఉన్నాయి. ఫ్లోరిడా, టెక్సాస్‌, ఆరిజోనా వంటి రాష్ట్రాల్లో కేసులు అమాంతం పెరుగుతున్నాయి. ప్రణాళిక లేకుండా లాక్‌డౌన్‌లు ఎత్తివేయడం, మాస్కులు ధరించడానికి కొందరు అమెరికన్లు ఇష్టపడకపోవడం వంటి కారణాల వల్లే పలుచోట్ల కేసులు పెరుగుతున్నాయన్న విమర్శలున్నాయి.
ఐసీయూలు ఖాళీలు ఉండటం లేదు. రోగుల సంఖ్య పెరిగిపోతుండటంతో గంటలకొద్దీ ఆసుపత్రుల్లో వేచి ఉండాల్సిన పరిస్థితులు నెలకొన్నాయి. అమెరికాలో మొత్తం ఇంతవరకు 18.02 లక్షల మంది కోలుకోవడమే కొంతలో కొంత ఊరట.
21 లక్షలకు చేరువలో..
కేసులు, మరణాల్లోనూ రెండో స్థానంలో ఉన్న బ్రెజిల్‌లో పరిస్థితి తీవ్ర ఆందోళనకరంగా ఉంది. 20.99 లక్షలకు పైగా కేసులు నమోదు కాగా 79 వేల మందికి పైగా చనిపోయారు. ఆసుపత్రులన్నీ కిటకిటలాడుతున్నాయి.
మరణాలు తక్కువే అయినా..
కేసులపరంగా కొద్ది రోజుల క్రితం వరకు మూడో స్థానంలో ఉన్న రష్యా.. భారత్‌లో కొవిడ్‌ ఉద్ధృతి పెరగడంతో నాలుగో స్థానానికి తగ్గింది. 7.71 లక్షలకు పైగా కేసులున్నాయి. కరోనా ఉద్ధృతి తీవ్రంగా ఉన్న మిగతా దేశాలతో పోలిస్తే ఇక్కడ మరణాలు కొంత తక్కువగానే ఉన్నాయి. మరణాల సంఖ్యలో రష్యా 11వ స్థానంలో ఉంది. 12 వేల మందికి పైగా ప్రాణాలు కోల్పోయారు.
సగం కేసులు అక్కడే..
ఆఫ్రికా ఖండంలో దాదాపు సగం కేసులు ఈ దేశంలోనే ఉన్నాయి. 3.64 లక్షల మందికి పైగా కొవిడ్‌ బారిన పడ్డారు. అయితే తీవ్రత ఎక్కువ ఉన్న ఇతర దేశాలతో పోలిస్తే ఇక్కడ మరణాలు కొంత తక్కువగానే ఉన్నాయి. దాదాపు 5,033 వేల మంది ప్రాణాలు కోల్పోయారు. మరణాల పరంగా 22వ స్థానంలో ఉంది. గౌటెంగ్‌ ప్రావిన్స్‌లో కేసుల తీవ్రత ఎక్కువగా ఉంది.
బ్రిటన్..
దాదాపు 3 లక్షల కేసులున్న బ్రిటన్‌లో మరణాల సంఖ్య ఆందోళనకరంగా ఉంది. అమెరికా, బ్రెజిల్ తర్వాత ఇక్కడే ఎక్కువ మరణాలు సంభవించాయి. 45 వేల మందికి పైగా చనిపోయారు. క్రిస్మస్‌ నాటికి సాధారణ పరిస్థితులు నెలకొనవచ్చని ప్రధాని బోరిస్‌ జాన్సన్‌ ఆశిస్తుండగా.. శాస్త్రవేత్తలు మాత్రం టీకాలొస్తేనే అది సాధ్యమని అంటున్నారు.
మెక్సికో
మరణాల పరంగా నాలుగో స్థానంలో ఉన్న మెక్సికోలో 3.44 లక్షలకు పైగా కేసులు నమోదు కాగా.. 39 వేల మందికిపైగా ప్రాణాలు కోల్పోయారు.
ఇటలీ
కొద్ది నెలల క్రితం కొవిడ్‌ తీవ్రతతో అల్లాడిపోయిన ఇటలీలో ఉద్ధృతి కొంత తగ్గినా మరణాల పరంగా ఐదో స్థానంలో ఉంది. ఇక్కడ 35 వేల మందికి పైగా మృతిచెందారు.
| దేశం | మొత్తం కేసులు | మరణాలు |
| అమెరికా | 3,898,550 | 143,289 |
| బ్రెజిల్ | 2,099,896 | 79,533 |
| రష్యా | 771,546 | 12,342 |
| దక్షిణాప్రికా | 364,328 | 5,033 |
| పెరు | 353,590 | 13,187 |
| మెక్సికో | 344,224 | 39,184 |
| చిలీ | 330,930 | 8,503 |
| స్పెయిన్ | 307,335 | 28,420 |
| బ్రిటన్ | 294,792 | 45,300 |
