అల్ఖైదా, ఐసిస్ ఉగ్రవాద సంస్థలకు సంబంధించిన గ్రూప్లు... కొవిడ్ వ్యాప్తిపై తప్పుడు వార్తలు ప్రచారం చేస్తున్నాయని ఓ అమెరికా సంస్థ నివేదించింది. ' దేవుడిని నమ్మని వారిని వైరస్ శిక్షిస్తోందని, పశ్చిమ దేశాలపై దేవుడి ఆగ్రహానికి ఈ వైరస్ ప్రతిరూపమని' ప్రచారం చేస్తూ సామాజిక మాధ్యమాల్లో పోస్ట్లు చేస్తున్నారని పేర్కొంది. కరోనా వైరస్ను ఉగ్రవాదులు జీవ ఆయుధంగా ఉపయోగిస్తున్నారని వెల్లడించింది.
'వైరస్ ఆఫ్ డిస్ఇన్ఫర్మేషన్'
ఈ మేరకు... 'స్టాప్ ది వైరస్ ఆఫ్ డిస్ ఇన్ఫర్మేషన్' అనే పేరుతో నివేదికను విడుదల చేసింది అమెరికా అంతర్గత నేర, న్యాయ పరిశోధన సంస్థ (యూఎన్ఐసీఆర్ఐ). ఉగ్రవాద సంస్థలు తమ బలగాన్ని పెంచుకునేందుకు, ప్రభుత్వంపై ప్రజలకు నమ్మకం పోగొట్టేలా చేసేందుకు వైరస్ను జీవాయుధంలాగా ఉపయోగిస్తున్నాయని వెల్లడించింది.
వైరస్ 'భగవంతుడు పంపిన సైనికుడు' అని ఐసిల్, అల్ఖైదా సంబంధిత సంస్థలు చెబుతున్నాయని అమెరికా సంస్థ తన నివేదికలో పేర్కొంది. మరికొందరు... వైరస్ వ్యాప్తికి విదేశీయులు, వలసదారులు కారణమని వ్యాఖ్యానిస్తున్నారని వెల్లడించింది.
ఇదీ చదవండి:చైనా చేతికి అమెరికా ఆర్మీ రహస్యాలు!
