అమెరికాకు చెందిన ప్రముఖ బోయింగ్ 737 విమానాల ఇంజిన్లలో సమస్యలు తలెత్తుతున్నట్లు ఫెడరల్ ఏవియేషన్ అథారిటీ(ఎఫ్ఏఏ) తెలిపింది. ఇంజిన్లను అత్యవసరంగా పరీక్షించాలని ఆదేశాలు జారీ చేసింది. అవసరమైతే ఇంజిన్ భాగాలను మార్చాలని సూచించింది. విమానాలు ప్రయాణించే సమయంలో ఇంజిన్లు షట్డౌన్ అవుతున్నట్లు.. నాలుగు నివేదికలు వచ్చిన అనంతరం అప్రమత్తమైంది ఎఫ్ఏఏ.
ఈ ఆదేశాల ద్వారా మొత్తం 2 వేల ట్విన్ ఇంజిన్ ప్యాసెంజర్ జెట్ విమానాలపై ప్రభావం పడనున్నట్లు ఎఫ్ఏఏ స్పష్టం చేసింది. కనీసం ఏడు రోజుల క్రితం పార్కింగ్ చేసిన విమానాలు, సేవలు పునరుద్ధరించాక 11 సార్ల కంటే తక్కువ ప్రయాణించిన అన్ని బోయింగ్ 737 విమానాలను ఆపరేటర్లు కచ్చితంగా పరీక్షించాలని పేర్కొంది. కొన్ని ఇంజిన్ కవాటాలు బహిరంగ స్థితిలో ఉన్నప్పుడు సమస్యలు ఉత్పన్నమవుతున్నాయని వివరించింది.
కవాటాల్లో తుప్పు వల్ల ఇంజిన్లు పూర్తిగా శక్తి కోల్పోయి.. రీస్టార్ట్ చేసే సామర్థ్యం లేకుండా తయారవుతున్నట్లు ఎఫ్ఏఏ పేర్కొంది. ఈ సమస్యల వల్ల పైలట్లు విమానాలను విమానాశ్రయాల్లో కాకుండా ఇతర ప్రాంతాల్లో ల్యాండ్ చేయాల్సి వస్తోందని తెలిపింది. అయితే కరోనా సంక్షోభం కారణంగా చాలా విమానాలను వినియోగించలేదని వెల్లడించిన బోయింగ్.. కచ్చితంగా విహంగాల్లోని అన్ని భాగాలను పరీక్షిస్తామంది.
