ఇథియోపియాలో చెలరేగిన ఘర్షణల్లో ఆ దేశ సైన్యాధ్యక్షుడు, రాజకీయ నేత సీర్ మెకోన్నెన్ హత్యకు గురయ్యారు. రాజధాని అడీస్ అబాబాలో ఆయన భద్రతా సిబ్బందిలో ఒకరు ఆయనను తుపాకితో కాల్చి చంపాడు. ఇథియోపియా ఉత్తర ప్రాంతం అంహారాలో ఓ జాతికి చెందిన తిరుగుబాటుదారులు స్థానిక ప్రభుత్వ అధికారులపై చేస్తోన్న దాడిని అడ్డుకునే క్రమంలో మెకోన్నెన్ ప్రాణాలు కోల్పోయారని ఆ దేశ ప్రధాని అబియ్‌ అహ్మద్‌ ప్రకటించారు.
అంహారా గవర్నర్‌ అంబచ్యూ మెకోన్నెన్‌తో పలువురు అధికారులు కీలక సమావేశం ఏర్పాటు చేసిన నేపథ్యంలో ఈ ఘర్షణ చోటు చేసుకుంది. ఈ ఘర్షణల్లో గవర్నర్‌తో పాటు పలువురు అధికారులు ప్రాణాలు కోల్పోయినట్లు ప్రధాని తెలిపారు. ఈ దాడి వెనుక అంహారా ప్రాంత ప్రధాన భద్రతాధికారి అసామిన్యూ సిగే ఉన్నారని, ఆయనే దీనికి కుట్ర పన్నారని ప్రధాని కార్యాలయం ప్రకటన చేసింది. సైన్యాధ్యక్షుని హత్య నేపథ్యంలో ఇథియోపియా రాజధానిలోని అమెరికా అధికారులు, ప్రతినిధులు జాగ్రత్తగా ఉండాలని యూఎస్ సూచించింది.
అంహారా జాతికి చెందిన వారు ఇథియోపియాలో అత్యధిక సంఖ్యలో ఉంటారు. గత నెల అంహారా, గుముజ్‌ జాతుల ప్రజల మధ్య హింస చెలరేగి పదుల సంఖ్యలో ప్రాణాలు కోల్పోయారు. ముఖ్యంగా భూములకు సంబంధించిన సమస్యల వల్ల వీరి మధ్య ఘర్షణలు చెలరేగుతున్నాయి. ఫలితంగా అనేక మంది తమ ప్రాంతాలను వదిలి ఇతర ప్రాంతాలకు తరలిపోతున్నారు.
2018లో ఇథియోపియా ప్రధానిగా బాధ్యతలు స్వీకరించిన అమియ్‌ అహ్మద్‌.. దేశంలో ఘర్షణపూరిత వాతావరణాన్ని తగ్గించడానికి పలు చర్యలు తీసుకున్నారు. రాజకీయ నేరస్థులను జైళ్లలోంచి విడుదల చేయించారు. పలు రాజకీయ పార్టీలపై నిషేధాన్ని ఎత్తివేశారు. వీటికి తోడు సైనిక సిబ్బంది కూడా తమ వేతనాలు పెంచాలని పెద్ద ఎత్తున డిమాండ్‌ చేస్తున్నారు.
ఇదీ చూడండి : వాయుదాడుల తర్వాత.. సముద్రంలో 21 రోజులు
