'భారత్​పై నిఘా కాదు- వ్యర్థాల పరిశీలనే'

ఉపగ్రహ విధ్వంసక క్షిపణి ప్రయోగం అనంతరం భారత్​పై నిఘా పెట్టలేదని అమెరికా స్పష్టం చేసింది. ఏ-శాట్​ ప్రయోగం అనంతరం అమెరికా నిఘా విమానం హిందూమహాసముద్రంపై చక్కర్లు కొట్టినట్టు వార్తలొచ్చాయి. అయితే.. ప్రయోగం వల్ల ఏర్పడిన వ్యర్థాలను పరిశీలిస్తున్నట్టు అమెరికా రక్షణ విభాగం వెల్లడించింది.

భారత్​ ప్రయోగించిన ఉపగ్రహ విధ్వంసక క్షిపణి(మిషన్​ శక్తి)పై అమెరికా నిఘా పెట్టిందని వచ్చిన వార్తలను అగ్రరాజ్యం ఖండించింది. భారతదేశంతో తమకున్న అనుబంధాన్ని మరింత బలోపేతం చేయడానికి కృషి చేస్తామని పునరుద్ఘాటించింది.

"భారతపై అమెరికా నిఘా పెట్టలేదు. అంతరిక్ష, ఆర్థిక రంగాల్లో భారత్​తో సంబంధాలను బలోపేతం చేసే దిశగా అమెరికా కృషి చేస్తుంది.''
-అమెరికా రక్షణ శాఖ ప్రతినిధి.

భారత తొలి ఏ-శాట్​ ప్రయోగం గురించి తమకు ముందే తెలుసునని అగ్రరాజ్యం స్పష్టం చేసింది. ప్రయోగ సమయంలో భారత్​ రద్దు చేసిన విమాన సేవల వివరాలను పరిశీలించి అంచనా వేశామని తెలిపింది.

'మిషన్​ శక్తి' పరీక్ష విజయవంతమైందని ప్రధానమంత్రి నరేంద్ర మోదీ బుధవారం ప్రకటించారు. ఈ ప్రయోగం చేసిన నాలుగో దేశంగా భారత్​ అవతరించింది. అదే రోజు రాత్రి 11 గంటల 30 నిమిషాల సమయంలో అమెరికాకు చెందిన ఆర్​సీ- 135 ఎస్​ కోబ్రా బాల్​ నిఘా విమానం హిందూ మహాసముద్రంపై చక్కర్లు కొట్టినట్టు వార్తలు వచ్చాయి. పేలుళ్లు, ప్రయోగాలు జరిగినప్పుడు ఉత్పన్నమయ్యే బాలిస్టిక్​ డేటాను సేకరించే విలువైన సాంకేతికత ఈ విమానం సొంతం.

వ్యర్థాలను పరిశీలిస్తున్నాం...

ఉపగ్రహ విధ్వంసక క్షిపణి ప్రయోగం సృష్టించిన వ్యర్థాలపై అమెరికా ఆవేదన వ్యక్తం చేసింది. తాజాగా వ్యర్థాలలోని దాదాపు 270 శకలాలను పరిశీలిస్తున్నట్టు తెలిపింది. వీటి వల్ల అంతర్జాతీయ అంతరిక్ష కేంద్రం(ఐఎస్​ఎస్​)కు ఎలాంటి ప్రమాదం లేదని స్పష్టం చేసింది. ప్రయోగంతో ఉత్పన్నమైన వ్యర్థాలు భూ వాతావరణంలో పడిపోయే వరకు ట్రాక్​ చేస్తామని అమెరికా వ్యూహాత్మక మండలి వర్గాలు వెల్లడించాయి.

ఇదీ చూడండీ:బంగాళాఖాతంపై అమెరికా 'కోబ్రా' కన్ను !