అమెరికా అధ్యక్ష ఎన్నికల్లో భాగంగా జార్జియాలో చేపట్టిన ఆడిట్ (చేతితో ఓట్ల లెక్కింపు) ప్రక్రియ నేటి రాత్రి నాటికి ముగుస్తుందని ఎన్నికల అధికారులు భావిస్తున్నారు. ఇది ఎన్నికల ఫలితాలను ప్రకటించేందుకు రాష్ట్ర అధికారులను అనుమతిస్తుందని ఓ సీనియర్ అధికారి తెలిపారు.
కొత్త చట్టం ప్రకారమే ఆడిట్..
రాష్ట్రంలో ఇటీవల తీసుకొచ్చిన కొత్త చట్టం ప్రకారం ఆడిట్ అవసరమైన 5 మిలియన్ల ఓట్లను చేతితో లెక్కిస్తున్నారు. అయితే ఇది ఎన్నికలపై అనుమానాలు, రీకౌంటింగ్పై అధికారిక అభ్యర్థనతో మాత్రం కాదని స్పష్టం చేశారు అధికారులు.
రాష్ట్ర ఎన్నికలపై కొత్త చట్టాన్ని గత ఏడాది అమలులోకి తెచ్చారు. అయితే.. చట్టంలో భాగంగా ఆడిట్ నిర్వహించాలా వద్దా అన్న దానిపై రాష్ట్ర మంత్రిదే తుది నిర్ణయం. అధ్యక్ష ఎన్నికలు ముఖ్యమైనవి, చాలా తక్కువ మార్జిన్ ఉండటం వల్ల రీకౌంటింగ్ అవసరంగా భావించినట్లు తెలిపారు రాష్ట్ర మంత్రి బ్రాడ్ రాఫెన్స్పెర్గర్.
గురవారం ఫలితాల ప్రకటన!
ఎన్నికల ఫలితాలను ప్రకటించేందుకు శుక్రవారంతో గడువు ముగుస్తున్న క్రమంలో.. ఈ ఆడిట్ను పూర్తి చేసేందుకు రాష్ట్రంలోని కౌంటీలకు బుధవారం రాత్రి 11.59 గంటల వరకు గడువు ఇచ్చారు. గడువులోపు ఆయా ప్రాంతాలు ఆడిట్ను పూర్తి చేస్తాయని భావిస్తున్నట్లు చెప్పారు అధికారులు. ఈ రీకౌంటింగ్ నివేదికను రాష్ట్ర మంత్రి కార్యాలయం గురువారం విడుదల చేసేందుకు ప్రణాళిక చేస్తున్నట్లు చెప్పారు.
మార్జిన్ తక్కువే..
జార్జియాలో మొదట డెమొక్రాటిక్ అభ్యర్థి జో బైడెన్కు.. ప్రస్తుత అధ్యక్షుడు డొనాల్డ్ ట్రంప్పై 14000 ఓట్ల మెజారిటీతో లభించింది. ఆ తర్వాత డగ్లస్, ఫయెట్టీ, ఫ్లోయిడ్, వాల్టన్ కౌంటీల్లో గతంలో తెరవని బ్యాలెట్లను చేతితో లెక్కించటం వల్ల బైడెన్ మెజారిటీ స్వల్పంగా తగ్గి 12,800కు చేరుకుంది.
ఫలితాలను ప్రకటించిన తర్వాత జోబైడెన్, ట్రంప్ల మధ్య మెజారిటీ మార్జిన్ 0.5 శాతంగానే ఉండనుంది. ఇందులో ఓటమి పాలైన పార్టీ రీకౌంట్ చేపట్టాలని కోరేందుకు రెండు రోజుల సమయం ఉంటుంది. చేతితో లెక్కిస్తున్న క్రమంలో వచ్చే ఫలితాలు ప్రతిఒక్కరికి విశ్వాసాన్ని కలిగిస్తాయన్నారు ఎన్నికల అధికారి స్టెర్లింగ్. అయితే.. అభ్యర్థన వస్తే రీకౌంటింగ్ చేసే అవకాశం ఉందన్నారు. అలా జరిగితే అది ఎన్ని రోజులు పడుతుందో చెప్పలేమని, గతంలో ఎప్పుడూ రాష్ట్రవ్యాప్తంగా రీకౌంటింగ్ చేపట్టలేదని తెలిపారు.
ఇదీ చూడండి: అలస్కాలో ట్రంప్ విజయం- జార్జియాలో రీకౌంటింగ్
