ప్రస్తుత కరోనా పరిస్థితుల్లో జీ- 7 సదస్సు జరిగితే ఆర్థిక వ్యవస్థ పునరుద్ధరణకు గొప్ప సాక్ష్యంగా నిలుస్తుందని అమెరికా అధ్యక్షుడు డొనాల్డ్ ట్రంప్ అన్నారు. జూన్ చివరివారంలో నిర్వహించే ఈ అగ్రరాజ్యాల శిఖరాగ్ర సదస్సు వీడియో కాన్ఫరెన్స్ ద్వారా అవకాశం ఉంది.
అభివృద్ధి చెందిన దేశాలు కలిసి జీ- 7 కూటమిగా ఏర్పడ్డాయి. ఇందులో అమెరికా, బ్రిటన్, ఫ్రాన్స్, జర్మనీ, ఇటలీ, జపాన్, కెనడా సభ్యులుగా ఉన్నాయి. జీ- 7 దేశాల అధ్యక్షుల వార్షిక సదస్సు అమెరికాలో నిర్వహించాల్సి ఉంది. జీ- 7 సదస్సును ఎలాగైనా నిర్వహించాలని చాలా రోజులుగా ట్రంప్ ప్రయత్నిస్తున్నారు.
"అధ్యక్షుడు ట్రంప్ ఈ సదస్సు జరగాలని కోరుకుంటున్నారు. అమెరికా పునరుద్ధరణలో భాగంగా సాధారణ పరిస్థితులను తీసుకొచ్చేందుకు ప్రయత్నిస్తున్నాం. సామాజిక దూరం పాటిస్తూనే కార్యకలాపాలను పునరుద్ధరిస్తున్నాం. ఈ సమయంలో జీ-7 సదస్సు జరిగితే అమెరికా పునరుద్ధరణకు గొప్ప ఉదాహరణగా నిలుస్తుందని అధ్యక్షుడు భావిస్తున్నారు. "
- కేలీ మెక్ఎనానీ, శ్వేతసౌధ మీడియా కార్యదర్శి
సదస్సుకు వచ్చేందుకు ఆసక్తి చూపిస్తున్న ప్రపంచనేతలతో జాతీయ భద్రత సలహాదారు రాబర్ట్ ఒబ్రెయిన్ సంప్రదింపులు జరుపుతున్నట్లు కేలీ చెప్పారు. సదస్సుకు వచ్చే దేశాధినేతలకు అమెరికా అధ్యక్షుడి తరహాలో రక్షణ కల్పిస్తామని స్పష్టం చేశారు. ఈ ప్రకటన తర్వాత విదేశీ నేతలు సానుకూలంగా స్పందించినట్లు కేలీ తెలిపారు.
ఇదీ చూడండి: కరోనా వేళ జీ-7 సదస్సుకు సిద్ధమన్న ట్రంప్
