బ్రెజిల్లో కరోనా వైరస్ విజృంభిస్తున్న తరుణంలో.. కీలక చట్టానికి ఆమోదం తెలిపారు ఆ దేశాధ్యక్షుడు బొల్సొనారో. ఈ చట్టం ప్రకారం.. కరోనా వైరస్ కట్టడి కోసం బహిరంగ ప్రదేశాలు, వీధులు, ప్రజా రవాణా వేదికల్లో ప్రతి ఒక్కరు మాస్కులను తప్పనిసరిగా ధరించాలి.
అయితే చర్చిలు, పాఠశాలలు, దుకాణాలు, ఫ్యాక్టరీలకు ఈ చట్టం నుంచి మినహాయింపునిచ్చారు అధ్యక్షుడు. ఈ ప్రదేశాల్లో మాస్కులు ధరించాలని ప్రజలను ఆదేశిస్తే.. అది ఆస్తి హక్కులను ఉల్లంఘించినట్టు అవుతుందన్నారు. దీనితో పాటు పేదలకు, ఉద్యోగులకు ప్రభుత్వం మాస్కులను సరఫరా చేయకూడదని తేల్చారు.
కరోనా వైరస్ కేసుల సంఖ్యలో బ్రెజిల్ ప్రపంచవ్యాప్తంగా 2వ స్థానంలో కొనసాగుతోంది. ఇప్పటివరకు 15,45,458 కేసులు నమోదయ్యాయి. 63,295మంది ప్రాణాలు కోల్పోయారు. అయితే పరీక్షలు సరిగ్గా జరగడం లేదని నిపుణులు ఆరోపిస్తున్నారు. అందుకే కేసుల సంఖ్య తక్కువగా ఉందంటున్నారు.
పరిస్థితి ఇంత దారుణంగా ఉన్నప్పటికీ బ్రెజిల్వాసుల్లో చాలా మంది మాస్కులు ధరించడం లేదు. భౌతిక దూరం నియమాన్ని పాటించడం లేదు. కరోనా కట్టడి, ముఖ్యంగా మాస్కులు ధరించే విషయంలో అధ్యక్షుడు తీరుపైనా సర్వత్రా విమర్శలు వెల్లువెత్తాయి. బహిరంగ ప్రదేశాల్లో మాస్క్ ధరించకుండా అనేకమార్లు మీడియా కంటపడ్డారు బొల్సొనారో.
ఇదీ చూడండి:- 'మరణాలు పెరిగినా.. నేనేమీ అద్భుతాలు చేయలేను'
