ఫార్ములా-ఈ కార్‌ రేస్‌ కేసుపై సీఐయూ​ ఏర్పాటు - తెలంగాణ భవన్​ వద్ద భారీగా పోలీసులు

ఏసీబీలోని సీఐయూ ఆధ్వర్యంలో కొనసాగనున్న దర్యాప్తు - డీఎస్పీ స్థాయి అధికారి నేతృత్వంలో పనిచేయనున్న సీఐయూ

Formula E-Car Race Latest News : ఫార్ములా -ఈ కార్‌ రేస్‌పై విచారణ చేపట్టేందుకు ప్రత్యేక దర్యాప్తు బృందం (స్పెషల్ ఇన్వెస్టిగేషన్​ టీమ్​) ఏర్పాటు అయ్యింది. ఈ దర్యాప్తు ఏసీబీలోని సీఐయూ ఆధ్వర్యంలో కొనసాగనుంది. సీఐయూ డీఎస్పీ స్థాయి అధికారి నేతృత్వంలో పనిచేయనున్నట్లు సమాచారం. ఈ కేసును ఎస్పీ స్థాయి అధికారి నిరంతర పర్యవేక్షణలో ప్రభుత్వం విచారణ జరుపనుంది. ప్రస్తుత ఏసీబీ డైరెక్టర్ తరుణ్ జోషి ఐపీఎస్​ ఈ కేసును ఎప్పటికప్పుడు పర్యవేక్షించునున్నారు. ఏసీబీ హెచ్ఎండీఏతో పాటు పలు శాఖల నుంచి ఫైల్స్ తెప్పించుకుంటోంది. ఎస్ ఎక్స్ అనే కంపెనీతో ఉన్న ఒప్పందాలను మొదటగా పరిశీలించాలని ఏసీబీ భావిస్తోంది.

వేగం పెంచిన ఏసీబీ : ఫార్ములా-ఈ కార్ రేస్ కేసులో విచారణను ఏసీబీ మరింత వేగవంతం చేసింది. ఫార్ములా-ఈలో అక్రమాలు జరిగినట్లు ఐఏఎస్‌ అధికారి దాన కిషోర్‌ ఫిర్యాదు చేశారు. ప్రస్తుతం పురపాలక శాఖ ప్రిన్సిపల్ సెక్రటరీగా ఉన్న దాన కిషోర్ స్టేట్‌మెంట్‌ ఏసీబీ రికార్డ్ చేయనున్నట్టు సమాచారం. ఫార్ములా- ఈ రేస్​కు సంబంధించి రూ.54 కోట్ల 88 లక్షల అక్రమాలు జరిగాయని ఏసీబీకి కేసు నమోదు చేసింది. ఫిర్యాదులో ప్రైవేట్ కంపెనీకి డబ్బు చెల్లించడంతో ప్రభుత్వ ఖజానాకు గండి పడిందని పేర్కొన్నారు.

ఏ1గా కేటీఆర్ : ఫార్ములా-ఈ కేసులో అప్పటి మున్సిపల్ శాఖ మంత్రి, బీఆర్​ఎస్ వర్కింగ్ ప్రెసిడెంట్ కేటీఆర్‌ను ఏ1గా , ఐఏఎస్‌ అధికారి అర్వింద్‌ కుమార్‌ ఏ2గా, హెచ్‌ఎండీఏ చీఫ్‌ ఇంజినీర్‌ బీఎల్‌ఎన్‌ రెడ్డిలను ఏ3గా చేర్చింది. త్వరలోనే ఈ కేసు విచారణ కోసం ఏసీబీ ఈ ముగ్గురికి నోటీసులు జారీ చేసే అవకాశముంది. హెచ్‌ఎండీఏ, రాష్ట్ర ఆర్థికశాఖ, ఆర్బీఐ అనుమతి లేకుండానే నేరుగా విదేశీ సంస్థకు రూ.55 కోట్ల చెల్లింపులు జరిగాయి. వీటిలోనూ రూ.46 కోట్ల వరకు డైరెక్ట్​గా డాలర్ల రూపంలో చెల్లించడం ఉల్లంఘనే అని ప్రధాన అభియోగం. విదేశీ సంస్థకు నగదు చెల్లింపులపై ఎలా జరిగాయనే కోణంలో ఏసీబీ దర్యాప్తు చేయనుంది.

తెలంగాణ భవన్​ వద్ద భారీగా పోలీసులు : తెలంగాణ భవన్​ వద్ద భారీగా పోలీసులు మోహరించారు. కేటీఆర్​పై కేసు నమోదు దృష్ట్యా ఎలాంట్ అవాంఛనీయ ఘటనలు జరగకుండా ముందు జాగ్రత్తగా పోలీసులను మోహరించారు.