అమెరికా క్యాపిటల్ వద్ద కారు బీభత్సం.. పోలీసు మృతి!

భద్రతా కారణాలతో అమెరికా క్యాపిటల్ భవనాన్ని మూసివేశారు అధికారులు. భవనం ఆవరణలో ఓ కారు బీభత్సం సృష్టించింది. కారు ఢీకొనటం వల్ల ఒక భద్రతా అధికారి ప్రాణాలు కోల్పోయారు. నిందితుడిని హతమార్చారు భద్రతా సిబ్బంది.

అమెరికా రాజధాని వాషింగ్టన్​లోని క్యాపిటల్​ భవనం వద్ద మరోసారి కలకలం రేగింది. అక్కడ వేగంగా దూసుకొచ్చిన ఓ కారు.. భవనం వద్ద ఉన్న బ్యారికేడ్​ను బలంగా ఢీ కొట్టింది. ఇద్దరు భద్రతా సిబ్బంది గాయపడ్డారు. ఆ తర్వాత దుండగుడు ఓ పోలీసు అధికారిని కత్తితో పొడిచాడు. తీవ్రంగా గాయపడిన ఆ అధికారి చికిత్స పొందుతూ మృతిచెందారు. మరో జవాను చికిత్స పొందుతున్నారు.

అనంతరం కారు డ్రైవర్​ను భద్రతా సిబ్బంది కాల్చి చంపారు. క్యాపిటల్ భవనం వెలుపల ఉన్న చెక్​పోస్టు వద్ద ఈ ఘటన జరిగిందని అధికారులు తెలిపారు.

క్యాపిటల్​ ప్రాంగణాన్ని దిగ్బంధించిన అధికారులు

ఆ సమయంలో అమెరికా కాంగ్రెస్ సమావేశంలో లేదు. పోలీసులపై దాడి నేపథ్యంలో కేపిటల్‌ భవన సముదాయం వద్ద నేషనల్‌ గార్డ్స్‌ను మోహరించారు. ఈ ఘటన వెనుక ఉగ్రకోణాన్ని అధికారులు కొట్టివేశారు.

జనవరి 6న ట్రంప్‌ మద్దతుదారులు కేపిటల్ భవనంపై దాడి తర్వాత ఆ తరహా ఘటన ఇదేనని అధికారులు తెలిపారు. ఆ ఘటనలో ఓ పోలీసు అధికారి సహా ఐదుగురు చనిపోయారు. దానితో ప్రస్తుత దాడికి సంబంధం ఉందని ఇప్పడే చెప్పలేమని అధికారులు తెలిపారు.

ఇదీ చూడండి: 'అమెరికాకు అసలైన అర్థం.. నా బృందం'