అగ్రరాజ్య అధ్యక్ష ఎన్నికల్లో ముందస్తు సర్వేలే నిజమయ్యాయి. డొనాల్డ్ ట్రంప్పై జో బైడెన్ ఘన విజయం సాధించారు. ఫలితంగా రెండోసారి అధ్యక్ష పదవిని అలంకరించాలన్న ట్రంప్ ఆశయానికి గండిపడింది.
బైడెన్ అధికారంలోకి వస్తే కరోనాను కట్టడి చేస్తారని ప్రతి 10మందిలో నలుగురు ఓటర్లు విశ్వసించారు. ట్రంప్ కంటే ఆయన మెరుగైన పాలన అందిస్తారని భావించారు. అగ్రరాజ్యంలో జాత్యహంకార ఘటనలు పెరగడం సహా జాతివివక్షను ప్రేరేపించేలా ట్రంప్ వ్యాఖ్యలు.. రిపబ్లికన్ అధ్యక్షుడి ఓటమికి కారణమయ్యాయి.
తొలి సంతకం-100 రోజుల ప్లాన్...
అమెరికా అధ్యక్షుడిగా ఎన్నికైన బైడెన్ ముందు కొన్ని లక్ష్యాలున్నాయి. కరోనా కట్టడికి సంబంధించి కార్యాచరణ ప్రణాళికపై తొలి సంతకం చేస్తారని అందరూ భావిస్తున్నారు. ఆ తర్వాత ఆర్థిక వ్యవస్థ, వాతావరణ మార్పులపైనా నూతన అధ్యక్షుడు దృష్టిపెట్టనున్నారు.
కరోనాపై పోరు..
లక్షలాది ప్రాణాలు బలి తీసుకున్న కరోనా నియంత్రణపై కీలక నిర్ణయం తీసుకోనున్నారు బైడెన్. దేశవ్యాప్తంగా కరోనా కట్టడి కోసం నయా ప్రణాళికను అమలు చేయనున్నారు. ప్రజారోగ్య సంరక్షణ విషయంలోనూ మొదటి ప్రకటన చేయనున్నారు. మాస్కు తప్పనిసరి చేయడం, టెస్టింగ్, కాంటాక్ట్ ట్రేసింగ్ను పెంచడం, కొవిడ్-19 కారణంగా ఇబ్బందుల్లో ఉన్న కుటుంబాలకు సాయం చేయడం వంటి చర్యలు చేపట్టనున్నారు బైడెన్.
పట్టాలపైకి ఆర్థికం..
కరోనా వల్ల దెబ్బతిన్న ఆర్థిక వ్యవస్థను పట్టాలెక్కించేందుకు చర్యలు చేపట్టనున్నారు బైడెన్. కొవిడ్ ఉపశమన బిల్లు పేరిట దాదాపు 2 ట్రిలియన్ డాలర్ల ప్యాకేజీని ప్రకటించే అవకాశం ఉంది.
పారిస్ ఒప్పందం...
బైడెన్ మళ్లీ పారిస్ ఒప్పందంలో అమెరికాను భాగం చేయనున్నారు. నవంబర్ 4నే ఈ ఒడంబడిక నుంచి వైదొలిగింది అగ్రరాజ్యం.
ఇరాన్పై ఆంక్షలు..
ఇరాన్పై ట్రంప్ ప్రభుత్వం విధించిన ఆంక్షలను.. బైడెన్ తొలగించే అవకాశం ఉంది. 2015లో ఇరాన్తో చేసుకున్న అణు ఒప్పందాన్ని అగ్రరాజ్యం పునరుద్ధరించనుంది. ఇదే జరిగితే టెహ్రాన్ చేస్తున్న అణుపరీక్షలకు తాత్కాలికంగా చెక్ పడుతుంది.
ఒబామా కేర్...
మాజీ అధ్యక్షుడు బరాక్ ఒబామా పేరిట ఏర్పాటైన ఒబామా కేర్ పథకాన్ని.. బైడెన్ ముందుకు తీసుకెళ్లనున్నారు. ట్రంప్ ప్రభుత్వం ఈ చట్టాన్ని రద్దు చేసేందుకు చాలా ప్రయత్నాలు చేసింది.
పోలీస్ వ్యవస్థ...
నల్లజాతీయుల నిరసనలకు కారణమైన పోలీసింగ్ వ్యవస్థను నియంత్రించేందుకు నూతన అధ్యక్షుడు చర్యలు తీసుకొనే అవకాశముంది. అయితే ఆయా బిల్లులకు సభల్లో ఆమోదం లభిస్తుందా అన్నది మాత్రం ప్రశ్నార్థకం.
రష్యాతో చర్చలు..
అమెరికా-రష్యా మధ్య నిరాయుధీకరణ విషయంలో చేసుకున్న 'న్యూ స్టార్ట్' ఒప్పందం పొడిగించే అవకాశం ఉంది. రష్యా అధ్యక్షుడు వ్లాదిమిర్ పుతిన్ అంగీకరిస్తే.. మరో ఐదేళ్లపాటు దీన్ని కొనసాగించే సూచనలు కనిపిస్తున్నాయి. దీనితో ఇరుదేశాల మధ్య సంబంధాలు బలపడతాయి.
ప్రపంచ ఆరోగ్య సంస్థ...
ప్రపంచ ఆరోగ్య సంస్థ(డబ్ల్యూహెచ్ఓ)లో అమెరికా సభ్యత్వాన్ని బైడెన్ పునరుద్ధరించవచ్చు. ఆ సంస్థకు నిధులు కేటాయించడంపైనా నిర్ణయం తీసుకునే అవకాశముంది.
నిషేధం తొలగింపు..
ముస్లిం దేశాల నుంచి అగ్రరాజ్యానికి వచ్చే వారిపై ట్రంప్ ప్రభుత్వం ఇప్పటికే పలు ఆంక్షలు విధించింది. వాటిని తొలగించే విషయాన్ని పరిగణనలోకి తీసుకోనున్నారు బైడెన్.
సౌదీ అరేబియా, పశ్చిమాసియాలోని పలు దేశాలతో అంతర్జాతీయ సంబంధాలపై దృష్టిసారించనున్నారు బైడెన్. యెమెన్లో సౌదీ తలపెట్టిన యుద్ధానికి అగ్రరాజ్యం మద్దతు ఉపసంహరించుకునే అవకాశం ఉంది. 2016లో ప్రారంభమై మధ్యలో నిలిచిపోయిన మౌలిక సదుపాయాల ప్రాజెక్టులను వేగంగా పూర్తి చేయనున్నారు.
