Biden on Russia: రష్యా అధ్యక్షుడు వ్లాదిమిర్ పుతిన్పై తీవ్ర విమర్శలు చేశారు అమెరికా అధ్యక్షుడు జో బైడెన్. యుద్ధ రంగంలో పుతిన్ లాభపడొచ్చు కానీ.. దీర్ఘకాలంలో భారీ మూల్యం చెల్లించకతప్పదని హెచ్చరించారు. బలగాలతో దాడి చేయించి ఉక్రెయిన్ను స్వాధీనం చేసుకున్నా.. అక్కడి ప్రజల మనసులను గెలుచుకోలేరని పేర్కొన్నారు.
రష్యా అక్కడితో ఆగదు..
రష్యా చేస్తున్న దాడులు ఉక్రెయిన్కు పరిమితం కావని.. భవిష్యత్తులో ఇతర దేశాలపై కూడా దాడిని కొనసాగిస్తుందని బైడెన్ పేర్కొన్నారు.
"చరిత్ర నుంచి మనం పాఠం నేర్చుకున్నాం. నియంతలను కట్టడి చేయకపోతే వారు మరింత విధ్వంసం సృష్టిస్తారు. వాళ్ల దాడులను విస్తరిస్తారు. ఈ క్రమంలో అమెరికా సహా ప్రపంచ దేశాలకు ముప్పుకు గురయ్యే అవకాశాలు మరింత పెరుగుతాయి. అందుకే రెండో ప్రపంచ యుద్ధం తర్వాత నాటో కూటమిని ఏర్పాటు చేశాము.''
- బైడెన్, అమెరికా అధ్యక్షుడు
పుతిన్.. పక్కా ప్రణాళికతోనే ఈ యుద్ధాన్ని ప్రారంభించారని అన్నారు బైడెన్. 'పాశ్చాత్య దేశాలు, నాటో ఈ దాడులకు స్పందించవని పుతిన్ భావించారు.. కానీ పుతిన్ అంచనా తప్పు.. మేము ఏ పరిస్థితులనైనా ఎదుర్కొనేందుకు సిద్ధంగా ఉన్నాము.' అని పేర్కొన్నారు.
'చైనాకు అప్పుడే హెచ్చరించాను'
అమెరికన్లతో సవాల్ చేయడం మంచిది కాదని చైనా అధ్యక్షుడు జిన్పింగ్కు ఇదివరకే హెచ్చరించినట్లు బైడెన్ వెల్లడించారు. అన్ని రంగాల్లోనూ చైనాను అమెరికా అధిగమించాలంటే ప్రజలు, ఆర్థికవ్యవస్థ, ప్రజాస్వామ్యాలపైనే ప్రభుత్వం పెట్టుబడి పెట్టాలని చెప్పుకొచ్చారు.
రష్యా విమానాలపై నిషేధం
అమెరికా, దాని భాగస్వామ్య దేశాలు నాటోలోని ప్రతి అంగుళం భూభాగాన్ని కాపాడుకుంటాయని స్పష్టం చేశారు. ఉక్రెయిన్ ప్రజలకు అమెరికా మద్దతుగా నిలుస్తుందని ఉద్ఘాటించారు. అమెరికా గగనతలంలో రష్యా విమానాలపై నిషేధం విధించడం ద్వారా రష్యన్ విమాన సేవలపై ఇప్పటికే ఆంక్షలు విధించిన మిత్ర దేశాల సరసన చేరనున్నట్లు పేర్కొన్నారు. వార్షిక సమావేశంలో ఈ మేరకు రష్యా, ఉక్రెయిన్ అంశంపై మాట్లాడారు బైడెన్.
ఇదీ చూడండి : అణ్వాయుధాలను సిద్ధం చేస్తున్న రష్యా.. అక్కడే ప్రయోగం!
