ఆపిల్ సీఈవో టిమ్కుక్ ట్విట్టర్ ప్రొఫైల్ నేమ్ను కొంచెం మార్చారు. ఇంటి పేరు స్థానంలో ఆపిల్ సంస్థ లోగో ఎమోజీని ఉంచారు. అమెరికా అధ్యక్షుడు డొనాల్డ్ ట్రంప్, ఆపిల్ సీఈవో 'టిమ్ కుక్'ను పొరపాటున 'టిమ్ ఆపిల్'గా సంబోధించారు. ఇది సామాజిక మాధ్యమాల్లో వైరల్ అయింది. దీంతో టిమ్ తన ట్విట్టర్ ఖాతా పేరును కొద్దిగా మార్చారు.
బుధవారం శ్వేతసౌధంలో 'అమెరికా శ్రామిక విధాన సలహా సంఘం'తో ట్రంప్ సమావేశమయ్యారు. దేశంలోని ప్రముఖ పారిశ్రామిక వేత్తలతో చర్చించారు. ఆపిల్ సీఈవో టిమ్ కుక్ అమెరికాలో పెద్ద ఎత్తున పెట్టుబడులు పెడుతున్నారని కొనియాడారు. ఈ సందర్భంలోనే 'టిమ్కుక్'ను 'టిమ్ ఆపిల్' అని ఉచ్చరించారు.
ఇదేమీ మొదటిసారి కాదులే
ప్రముఖుల పేర్లను ఇలా మారు పేర్లతో పిలవడం ట్రంప్కు ఇది మొదటిసారేమీ కాదు. గతంలోనూ 'అమెజాన్' సంస్థ అధినేత 'జెఫ్ బెజోస్'ను 'జెఫ్ బోజో' అని, 'లాక్హీడ్ మార్టిన్' సీఈఓ 'మార్లిన్ హౌసన్'ని 'మార్లిన్ లాక్హీడ్' అని తప్పుగా పలికారు. ఇలా ట్రంప్ ప్రముఖుల పేర్లు తప్పుగా పలకడంపై సామాజిక మాధ్యమాల్లో నెటిజన్లు సరదాగా మీమ్లను షేర్ చేస్తున్నారు.
నిప్పు-ఉప్పు
అమెరికా అధ్యక్ష ఎన్నికల సమయంలో ట్రంప్ ఆపిల్ సంస్థపై ఆరోపణలు చేశారు. ఆపిల్ సంస్థ, సామ్సంగ్ మాదిరిగా మంచి ఫోన్లను తయారుచేయడంలేదని విమర్శించారు. అలాగే పారిస్ ఒప్పందం నుంచి అమెరికా వైదొలగాలన్న ట్రంప్ నిర్ణయాన్ని టిమ్కుక్ వ్యతిరేకించారు.
