అమెరికాలోని వాషింగ్టన్ విశ్వవిద్యాలయ శాస్త్రవేత్తలు కీలకమైన రీఏజెంట్ రసాయనాల అవసరం లేకుండానే కొవిడ్-19 పరీక్షను నిర్వహించేందుకు కొత్త విధానాన్ని అభివృద్ధి చేశారు. ప్రస్తుతం కొవిడ్-19 నిర్ధారణకు 'రివర్స్ ట్రాన్స్క్రిప్షన్' పాలిమరేజ్ చెయిన్ రియాక్షన్ ( ఆర్టీ-పీసీఆర్) పరీక్ష ప్రామాణికంగా ఉంది. ఇందులోని ఒక దశలో అరుదైన రీఏజెంట్లు అవసరం.
తాజాగా అభివృద్ధి చేసిన పరీక్షల్లో ఈ దశ అవసరం ఉండదు. అయినా 92శాతం కచ్చితత్వంతో ఫలితాలను ఇస్తోంది. వైరల్ లోడ్ చాలా తక్కువగా ఉన్న సందర్భాల్లోనే ఇది కరోనా జాడను పట్టుకోలేదని పరిశోధనలో పాలుపంచుకున్న జాసన్ బోటెన్ తెలిపారు. ఆర్టీ-పీసీఆర్ పరీక్షలో మూడు అంచెలు ఉన్నాయని, తాజా విధానంలో రెండు దశలకే పరిమితమని ఆయన వెల్లడించారు.
- పీసీఆర్లోని మొదటి దశలో.. వ్యక్తి ముక్కు నుంచి స్వాబ్ ద్వారా నమూనాను సేకరించి, దాన్ని ఒక ద్రవం లేదా మాధ్యమంలో ఉంచుతారు. ఫలితంగా స్వాబ్లోని వైరస్ ఆ ద్రవంలోకి వెళ్తుంది.
- రెండో దశలో ఆ ద్రవంలోని స్వల్ప నమూనాను తీసుకుని దానికి రీఏజెంట్లను జోడిస్తారు. వైరస్లోని ఆర్ఎన్ఏను వెలికితీసేందుకు ఇది అవసరం.
- మూడో దశలో.. నమూనాలోని వైరస్ జన్యు పదార్థాలను మరింతగా పెంచేందుకు ఇతర రసాయనాలను కలుపుతారు. అంతిమంగా ఈ నమూనాలో వైరస్ ఉంటే.. పాజిటివ్ సంకేతం వస్తుంది.
ఈ మూడు దశల గురించి చెప్పిన జాసన్.. కొత్త విధానంలో స్వాబ్ను ఒక ద్రవంలో ఉంచాక నేరుగా మూడో అంచెలోకి వెళ్లిపోవచ్చని వివరించారు.
