అమెరికా సరిహద్దులో వలసవాదుల కష్టాలు!

అమెరికా-మెక్సికో సరిహద్దుల్లో వలసవాదులు నానావస్థలు పడుతున్నారు. ఎలాగైన అగ్రరాజ్యంలో అడుగుపెట్టాలని పడిగాపులు కాస్తున్న వలసవాదులను స్మగ్లర్లు వివిధ మార్గాల్లో సరిహద్దు దాటిస్తున్నారు. గోడ రంధ్రం నుంచి, కంచె సందుల్లోంచి పారే నీటి ద్వారా... అమెరికాలోకి అక్రమంగా ప్రవేశింపజేస్తున్నారు. ముఖ్యంగా చిన్నారులతో సరిహద్దు దాటించే క్రమంలో పిల్లల ఏడుపులు వర్ణనాతీతం. ఈ వీడియో సామాజిక మాధ్యమాల్లో వైరలైంది.

అది మెక్సికో, అమెరికా సరిహద్దు. పిల్లలతో సహా వలసవాదులు సరిహద్దు వెంట ఉన్న ఓ సొరంగ మార్గం గుండా అమెరికాలోకి ప్రవేశించేందుకు తీవ్ర ప్రయత్నాలు చేస్తున్నారు. అగ్రరాజ్యం అధికారి వచ్చిన వారిని వచ్చినట్లు వెనక్కి పంపిస్తున్నారు. మంగళవారం అమెరికా సరిహద్దు భద్రతా దళం విడుదల చేసిన ఓ వీడియోలో ఇదంతా రికార్డయింది. ఈ వీడియో వైరల్ అవుతోంది.

గత కొన్ని నెలలుగా మెక్సికో సరిహద్దు నుంచి రికార్డు స్థాయిలో వలసవాదులు అమెరికాకు వచ్చి చేరుతున్నారు. వలస వచ్చిన వారిని అదుపులోకి తీసుకుని, తిరిగి పంపేయాలన్న అధ్యక్షుడు ట్రంప్ ఆదేశాల మేరకు అధికారులు వారిని వెనక్కి పంపుతున్నారు. డిసెంబర్ 21 నుంచి 1,25,000 మందిని అమెరికా ప్రభుత్వం వెనక్కి పంపింది.

"పిల్లల్ని తీసుకుని సుదూరాలకు నడవడం, ఆకలిని, చలిని లెక్కచేయకపోవటం, అడుగడుగునా ప్రమాదం పొంచి ఉండటం.. ఇలా ప్రతిదీ ఓ పెను సవాలే. పరిస్థితి ఏ మాత్రం ఆశాజనకంగా లేని ఇలాంటి ఓ స్థితిలో ఉండటం... ఇదంతా అర్థం చేసుకోవాలంటే నా జీవిత కాలం సరిపోదేమో."
-కోనీ ఫిలిప్స్, అధ్యక్షురాలు, లూథరన్ సామాజిక సంస్థ