ఉత్తర కొరియా తాజాగా చేసిన క్షిపణి ప్రయోగాలపై ప్రపంచ దేశాలు ఆందోళన వ్యక్తం చేశాయి. ప్రపంచ శాంతికి కృషి చేయాలని, అందుకోసం అణ్వాయుధాలు, బాలిస్టిక్ క్షిపణులను నిర్వీర్యం చేయాలని ఐరాస వేదికగా ఉత్తర కొరియాను 70 దేశాలు కోరాయి.
అణ్వాయుధ నిర్మూలన కోసం ఉత్తర కొరియాను అభ్యర్థించాలని ఫ్రాన్స్ ప్రతిపాదనలు చేసింది. ఇందుకు 15 దేశాలు మద్దతు పలికాయి. మరిన్ని దేశాలు ముందుకు రావాలని కోరాయి. అమెరికా, దక్షిణ కొరియాతోపాటు ఆసియా, లాటిన్ అమెరికా, ఆఫ్రికా, ఐరోపాలోని పలు దేశాలు అంగీకరించాయి.
"ఉత్తర కొరియా అభివృద్ధి చేసుకున్న అణ్వాయుధాలు, బాలిస్టిక్ క్షిపణులతో ప్రాంతీయ, అంతర్జాతీయ శాంతిభద్రతలకు విఘాతం కలిగే అవకాశం ఉంది. ఉద్రిక్తతలు తగ్గే విషయంలో మేం ఉత్తర కొరియాకు మద్దతిస్తాం. అమెరికాతో అణు నిరాయుధీకరణ చర్చలను కొనసాగించాలని కోరుతున్నాం."
-ఫ్రాన్స్ ముసాయిదా సారాంశం
ఉత్తర కొరియా మద్దతుదారులు రష్యా, చైనా మాత్రం ఈ ముసాయిదాకు ఆమోదం తెలపలేదు.
తాజాగా రెండు క్షిపణులను ఉత్తర కొరియా ప్రయోగించటంపై అమెరికా ఆగ్రహం వ్యక్తం చేసింది. ఇరు దేశాల మధ్య ఉద్రిక్తతలు మళ్లీ మొదటికి చేరాయి.
ఇదీ చూడండి: వారంలో రెండోసారి క్షిపణుల ప్రయోగం
