Salman khan: బాలీవుడ్ కండలవీరుడు సల్మాన్ ఖాన్, అనిల్ కపూర్, ఫర్దీన్ ఖాన్ కలిసి నటించిన కామెడీ చిత్రం 'నో ఎంట్రీ'.. అప్పట్లో ఘనవిజయం సాధించింది. 2002లో వచ్చిన ఈ సినిమా.. ప్రేక్షకులను పొట్ట చెక్కలయ్యేలా నవ్వించింది. ఇప్పటికీ టీవీలో వచ్చినా అదే స్థాయిలో అలరిస్తూ ఉంటుంది. అందుకే ఈ సినిమా సీక్వెల్పై సల్మాన్ ఫ్యాన్స్ సహా సాధారణ ప్రేక్షకుల్లోనూ విపరీతమైన ఆసక్తి ఏర్పడింది.
తొలుత ఈ సినిమాకు సీక్వెల్గా 'నో ఎంట్రీ మే ఎంట్రీ' వస్తుందనే వార్తలను మేకర్స్ ఖండించినా.. అనంతరం ఉంటుందని స్పష్టంచేశారు. దీంతో అభిమానుల ఆనందానికి అవధులు లేకుండా పోయాయి. అయితే వారిని మరింత ఆశ్చర్యానికి గురిచేసే ఓ అప్డేట్ ప్రస్తుతం మీడియాలో చక్కర్లు కొడుతోంది. ఈ సినిమాలో సల్మాన్ త్రిపాత్రాభినయం చేయనున్నట్లు సమాచారం. దాంతో పాటే సినిమాలో 10 మంది హీరోయిన్లు నటించనున్నట్లు తెలుస్తోంది.
దర్శకుడు అనీస్ బజ్మీ, సల్మాన్.. ఈ ప్రాజెక్టుపై పనిచేయడం ప్రారంభించినట్లు సమాచారం. ఈ ఏడాది చివర్లో షూటింగ్ ప్రారంభించనున్నట్లు తెలుస్తోంది. సల్మాన్తో పాటు అనిల్, ఫర్దీన్ కూడా ట్రిపుల్ రోల్ చేస్తారని వినికిడి. 'నో ఎంట్రీ'లో లారా దత్తా, సెలీనా జైట్లీ, బిపాషా బసు, ఈషా దేవోల్ ముఖ్య పాత్రల్లో నటించారు. కాగా, సీక్వెల్లో ఎవరిని ఎంపిక చేశారన్నది ఇంకా తెలియలేదు. అయితే ఇది మునుపటికన్నా ప్రేక్షకులకు మరింత వినోదాన్ని పంచేలా, భారీ బడ్జెట్తో రూపొందనున్నట్లు తెలుస్తోంది.
ఇదీ చూడండి: చిరు స్పెషల్ పార్టీ.. వేడుకలో కమల్, సల్మాన్ సందడి
