నేచురల్ స్టార్ నాని నటించిన 'దసరా' సినిమా పాన్ ఇండియా స్థాయిలో బాక్సాఫీస్ వద్ద హిట్ టాక్తో దూసుకెళ్తోంది. మంచి వసూళ్లను అందుకుంటోంది. రెండు రోజుల్లోనే రూ.50కోట్లకు పైగా వసూళ్లను అందుకుంది. దీంతో సినీ ప్రేక్షకులు థియేటర్లలో సినిమా చూసేందుకు క్యూ కడుతున్నారు. ఎక్కడ చూసిన హౌస్ ఫుల్ బోర్డులు కనిపిస్తున్నాయి. ఈ క్రమంలోనే ఓవర్సీస్లోనూ ఓ రికార్డును సాధించారు. జూనియర్ ఎన్టీఆర్ రికార్డును బ్రేక్ చేశారు.
అదేంటంటే.. వాస్తవానికి హీరో నానికి 'జెర్సీ' సినిమా తర్వాత సరైన హిట్ పడలేదు. 'గ్యాంగ్ లీడర్', 'వి', 'టక్ జగదీశ్', 'శ్యామ్ సింగ రాయ్', 'అంటే సుందరానికీ' భారీ హిట్లను అందుకోలేదు. వీటిలో కొన్ని డిజాస్టర్గా కూడా నిలిచాయి. అయినప్పటికీ ఆయనే మిడియం రేంజ్ హీరోల్లో నెంబర్ 1గా కొనసాగుతున్నారు. అలానే మరోవైపు ఓవర్సీస్ మార్కెట్ కలెక్షన్స్ విషయంలోనూ స్టార్ హీరోలతో పోటీ పడుతున్నారు. ఏకంగా టాప్-3లోకి దూసుకొచ్చేశారు. ప్రస్తుతం ఓవర్సీస్ మార్కెట్ కలెక్షన్స్ పరంగా.. ఆయన ఖాతాలో ఒకటి కాదు రెండు కాదు.. ఏకంగా 8 సినిమాలు.. 1 మిలియన్ మార్క్ను అందుకున్నాయి.
తాజాగా ఆయన నుంచి వచ్చిన దసరా చిత్రం కూడా కలెక్షన్లలో 1 మిలినయ్ మార్క్కు అందుకుంది. ఇప్పటికే ఏడు సార్లు ఈ రేర్ ఫీట్ను అందుకున్న నాని తాజా చిత్రంతో ఎనిమిదో సారి కూడా ఆ ఘనతను అందుకున్నారు. గతంలో నాని నటించిన 'ఈగ', 'నేను లోకల్', 'భలే భలే మగాడివోయ్', 'ఎంసీఏ', 'నిన్ను కోరి', 'జెర్సీ', 'అంటే సుందరానికీ!' చిత్రాలు 1 మిలియన్ మార్క్ను దక్కించుకున్నాయి. ఈ ఘనతతో.. టాలీవుడ్ నుంచి ఎక్కువ 1 మిలియన్ డాలర్ల సినిమాలు అందించిన రెండో హీరోగా నాని నిలిచారు. నాని కన్నా ముందు స్థానంలో మహేశ్ బాబు 11 సినిమాలతో ఉన్నారు. ఆయన తర్వాత నాని-ఎన్టీఆర్ 7 చిత్రాలతో సమానంగా ఉండేవారు. ఇప్పుడు ఎన్టీఆర్ను వెనక్కి నెట్టి రెండో స్థానంలో ఒక్కడే కొనసాగుతున్నారు.
ఇకపోతే ఎన్టీఆర్-కొరటాల కాంబినేషన్లో రూపొందుతున్న NTR 30 సినిమా కూడా కచ్చితంగా ఓవర్సీస్లో 1 మిలియన్ దక్కించుకునే అవకాశం ఉంటుంది. అయితే ఈ సినిమా సమయంలోనే నాని మరో రెండు చిత్రాలు చేస్తే అవి కూడా ఈ ఘనతను అందుకోవచ్చు. ఈ విధంగా చూస్తే.. నాని రికార్డును బ్రేక్ చేయడానికి ఎన్టీఆర్ మరింత సమయం పట్టొచ్చు. అలానే త్రివిక్రమ్ చిత్రం తర్వాత.. మహేశ్-రాజమౌళి సినిమా కూడా ఆలస్యం అయితే నాని అగ్రస్థానానికి వెళ్లిపోవచ్చు.
ఇదీ చూడండి: నానికి ఇప్పుడే అసలు సినిమా మొదలైందిగా.. మరి ఏం చేస్తాడో?
