శ్రీరామనవమి పర్వదినాన్ని పురస్కరించుకుని మార్చి 30న విడుదలైన 'దసరా' బాక్సాఫీస్ వద్ద దూసుకుపోతోంది. ఇప్పటికే రూ.87 కోట్ల గ్రాస్వసూళ్లను రాబట్టిన ఈ సినిమా రూ.100 కోట్ల మార్క్కు అతి చేరువలో ఉంది. కానీ, ఈ మార్క్ను నాని సినిమా అందుకుంటుందా లేదా అన్నది అసలు విషయం. ఎందుకంటే ఈ సినిమాకు ప్రస్తుతం కొన్ని అడ్డంకులు వచ్చి పడ్డాయి!
ట్రేడ్ వర్గాల అంచనా ప్రకారం ఇప్పటివరకు వరల్డ్ వైడ్గా రూ.47 కోట్ల షేర్ను సాధించింది దసరా మూవీ. కలెక్షన్ల రూపంలో సుమారు రూ.87 కోట్ల మార్క్ను ఈ సినిమా ఇప్పటికే చేరుకుంది. వినోద రంగంపై ఆధారపడే కొన్ని రంగాలు ముఖ్యంగా సినిమా థియేటర్లు.. ఇవి విక్రయించే టికెట్ల అమ్మకాలు సాధారణంగా వీక్ డేస్లలో తగ్గుతాయి. పైగా ఈరోజు సోమవారమే కావడం వల్ల టికెట్ బుకింగ్స్లో పెద్దగా డ్రాప్ కనిపించకపోయినా.. రానున్న రోజుల్లో ఈ సినిమా ప్రీ-బుకింగ్స్పై ప్రభావం పడుతుంది. దీంతో ఈ సినిమాకు అసలైన అగ్ని పరీక్ష ఇప్పుడు మొదలుకానుంది.
ఇప్పటికే దసరా అడ్వాన్స్ బుకింగ్స్ కాస్త నెమ్మదించినట్లు థియేటర్ల ఓనర్లు చెబుతున్నారు. ఈ క్రమంలో కేవలం రూ.13 కోట్ల తేడాతో వంద కోట్ల టార్గెట్ను చేరుకోవడానికి నేచురల్ స్టార్ నానికి ఈ రెండు వారాలు కీలకం కానున్నాయి. ఇప్పటికే లక్ష్యానికి అతి దగ్గర్లో ఉన్నందున కలెక్షన్ల విషయంలో పెద్దగా ఆందోళన పడాల్సిన పనిలేదని సినిమా డిస్ట్రీబ్యూటర్లు అభిప్రాయపడుతున్నారు.
సినిమా వసూళ్లపై ప్రభావం చూపే అంశాల్లో అధిక టికెట్ల ధర ఒకటి. ముఖ్యంగా హైదరాబాద్లో సినిమా టికెట్ల పెంపు అనేది తెలుగు సినిమా కలెక్షన్లపై తీవ్ర ప్రభావం చూపిస్తాయి. బడా సినిమా హాల్స్లో టికెట్ ధరలను పెంచడం వల్ల భారీ సినిమా కలెక్షన్స్కు కాస్త సహాయపడినా.. వీటిని మళ్లీ తగ్గించేందుకు థియేటర్ల యజమానులు సిద్ధంగా లేరు. దీంతో ఎక్కువ మొత్తంలో టికెట్లకు చెల్లించి మరీ పనిదినాల్లో సినిమాను చూడాలంటే ఆడియన్స్ పెద్దగా ఆసక్తి చూపకపోవచ్చు.
దసరా అడ్వాన్స్ బుకింగ్లు తగ్గడానికి మరో ప్రధాన కారణం.. రెండు తెలుగు రాష్ట్రాల్లో ఇవాళ్టి నుంచి పదో తరగతి వార్షిక పరీక్షలు ప్రారంభమయ్యాయి. ఈ నేపథ్యంలో పిల్లలు లేకుండా ఏ కుటుంబం కూడా పెద్దగా సినిమా హాల్స్కు వెళ్లి సినిమా చూసేందుకు ఆసక్తి చూపదు. పరోక్షంగా దీని ఎఫెక్ట్ కూడా దసరా సినిమా కలెక్షన్స్పై పడనుంది! ఇదిలా ఉంటే ఏప్రిల్ 7న రవితేజ రావణాసురతో పాటు కిరణ్ అబ్బవరం మీటర్ సినిమాలు థియేటర్లో విడుదలకు సిద్ధంగా ఉన్నాయి. రిలీజ్ తర్వాత రావణాసుర, మీటర్ ఈ రెండు సినిమాలపై ప్రేక్షకుల టాక్ను బట్టి 'దసరా' సినిమా వసూళ్లు రూ.100 కోట్లకు చేరుతుందా లేదా అన్నది తెలుస్తుంది. ఇకపోతే కేవలం రూ.13 కోట్ల దూరంలోనే ఉన్నందున నాని కచ్చితంగా వంద కోట్ల గ్రాస్ను కొల్లగొడతాని అభిమానులు ఆశాభావం వ్యక్తం చేస్తున్నారు. ఒకవేళ అదే జరిగితే నాని సినిమా కెరీర్లోనే ఈ సినిమా కలెక్షన్స్ పరంగా అతిపెద్ద మైలురాయిగా నిలవనుంది.
కాగా, మొదటి మూడు రోజుల్లోనే దసరా రూ.71 కోట్ల వసూళ్లను రాబట్టింది. కేవలం ఇండియాలోనే నాలుగో రోజు రూ.14 కోట్ల నెట్ కలెక్షన్స్ రాగా.. వరల్డ్వైడ్గా కలుపుకుని ఇప్పటివరకు రూ.87 కోట్లు వచ్చినట్లు ట్రేడ్ వర్గాలు చెబుతున్నాయి. ఈ సినిమాలో హీరో నాని పక్కా మాస్లుక్లో కనిపించారు. నటి కీర్తి సురేశ్ మహానటి తర్వాత మరోసారి తనదైన యాక్టింగ్తో ప్రేక్షకుల్ని కట్టిపడేసింది. దీక్షిత్ శెట్టి, సముద్రఖని, షైన్ టామ్ చాకో, సాయికుమార్, జరీనా వాహబ్ ఇలా మరికొంత మంది నటీనటులు తమదైన పాత్రలతో ఆడియన్స్ను అలరించారు. సంతోశ్ నారాయణన్ సంగీతం అందించగా.. దర్శక నిర్మాతలుగా శ్రీకాంత్ ఓదెల, సుధాకర్ చెరుకూరి వ్యవహరించారు.
