Hero Balakrishna Naresh: తారలు ఒకరి సినిమా సెట్‌కి మరొకరు వెళ్లి సందడి చేయడం తరచూ జరిగేదే. పక్కపక్కనే చిత్రీకరణలు జరుగుతున్నాయంటే తప్పకుండా ఆయా తారలు, ఆ సినిమాల బృందాలు కలుసుకుంటూ ఉంటాయి. అలా ఇటీవల అల్లరి నరేష్‌ 'ఇట్లు మారేడుమిల్లి ప్రజానీకం' చిత్రబృందం బాలకృష్ణను కలిసింది. బాలకృష్ణ సినిమా సెట్‌కు సమీపంలోనే నరేష్‌ కథానాయకుడిగా తెరకెక్కుతున్న 'ఇట్లు మారేడుమిల్లి ప్రజానీకం' చిత్రీకరణ జరిగింది.
ఈ సందర్భంగా కలిసిన అల్లరి నరేష్‌, ఇతర చిత్రబృందంతో బాలకృష్ణ సరదాగా ముచ్చటిస్తూ వివరాల్ని అడిగి తెలుసుకున్నారు. ఆ సమయంలో బాలయ్య వారితో నవ్వులు పూయించారు. అందుకు సంబంధించిన ఫొటోలు ప్రస్తుతం నెట్టింట వైరల్గా మారాయి. మాస్‌, యాక్షన్‌కు కేరాఫ్‌గా నిలిచే బాలయ్య, కామెడీకి కేరాఫ్‌గా నిలిచే అల్లరి నరేశ్ ఒకే ఫ్రేమ్‌లో చూసి అభిమానులు తెగ సంబరపడిపోతున్నారు.
ఆ ఫొటోల్లో బాలయ్య పవర్ఫుల్ లుక్లో కనిపించారు. ఆయన లుక్ చాలా బాగుందని అభిమానులు కామెంట్లు పెడుతున్నారు. 'సమరసింహారెడ్డి', 'నరసింహనాయుడు' సినిమాల లుక్‌ని తలపిస్తుందని సోషల్మీడియాలో మాట్లాడుకుంటున్నారు. కాకపోతే ఇందులో గెడ్డంతో ఉన్నారంతే అని అంటున్నారు. 'NBK 107'లో శ్రుతిహాసన్ హీరోయిన్గా నటిస్తుండగా.. మైత్రీ మూవీ మేకర్స్ నిర్మిస్తున్నారు. అల్లరి నరేష్‌ నటిస్తున్న 'ఇట్లు మారేడుమిల్లి ప్రజానీకం' చిత్రంలో ఆనంది హీరోయిన్గా నటిస్తున్నారు. అటవీ ప్రజల కోసం పోరాడే వ్యక్తి పాత్రలో నరేష్‌ కనిపించనున్నారు.
ఇవీ చదవండి: జోరు తగ్గించిన భామలు.. అవకాశాల్లేవా?.. ఆచితూచి అడుగులా?
లాయర్ అవతారం ఎత్తిన కీర్తి సురేశ్.. ఆసక్తికర కథతో అక్కినేని హీరో కొత్త సినిమా!
