'ఆర్ఆర్ఆర్' సినిమా బ్లాక్బస్టర్ హిట్తో టాలీవుడ్ స్టార్ హీరో రామ్ చరణ్.. మెగా పవర్ స్టార్ కాస్త గ్లోబల్ స్టార్గా మారిపోయారు. ఈ సినిమాలో ఆయన పాత్రకు మెస్మరైజ్ అయిన అభిమానులు.. చరణ్ పాత సినిమాలను ఇదే తరహాలో ఆదరిస్తున్నారు. ఇటీవలే ఆరెంజ్ సినిమాకు వచ్చిన రెస్పాన్సే ఇందుకు ఉదాహరణ. ఆర్ఆర్ఆర్ సినిమా తర్వాత కొరటాల దర్శకత్వంలో వచ్చిన ఆచార్యలో నటించినప్పటికీ ఆ సినిమా చెర్రీకి నిరాశే మిగిల్చింది.
ఆ తర్వాత ఆర్ఆర్ఆర్కు అవార్డుల వెల్లువ కొనసాగడం వల్ల ఆ పనుల్లో బిజీ అయిపోయారు చరణ్. ఇప్పుడు శంకర్ దర్శకత్వంలో తెరకెక్కుతున్న 'గేమ్ చేంజర్' సినిమాలో నటిస్తున్నారు. దిల్ రాజు నిర్మాతగా వ్యవహరిస్తున్న ఈ సినిమాలో కియారా హీరోయిన్ పాత్ర పోషిస్తున్నారు. వచ్చే ఏడాది సంక్రాంతి సందర్భంగా ప్రేక్షకుల ముందుకు రానున్నట్లు అఫీషియల్ అనౌన్స్మెంట్ కూడా వచ్చేసింది.
మరోవైపు ఈ సినిమా షూట్తో పాటు మరిన్ని చిత్రాలను లైన్లో పెట్టేశారట చరణ్. దీంతో త్వరలో మరింత బిజీ కానున్నారన్న మాట. తన 16వ సినిమా కోసం బుచ్చిబాబును డైరెక్టర్గా ఎంచుకున్నారు చెర్రీ. మైత్రీ మూవీ మేకర్స్ సన్నిహితులైన సతీశ్ ఈ సినిమాతో నిర్మాతగా మారనున్నారు. చరణ్ 17వ సినిమా ప్రముఖ నిర్మాణ సంస్థ యూవీ క్రియేషన్స్ బ్యానర్ మీద రూపొందనుంది. అయితే ఈ సినిమాకు దర్శకత్వం ఎవరు వహిస్తున్నారన్న విషయంపై ఇప్పటి వరకు క్లారిటీ రాలేదు. అప్పట్లో కన్నడ దర్శకుడు ప్రశాంత్ నీల్ శిష్యుడు డైరెక్టర్ నర్తన్ దర్శకత్వంలో అయితే ఓ సినిమాకు చెర్రీ ఓకే చెప్పారట. ఈ బ్యానర్పై తెరకెక్కనుంది ఆ సినిమానా కాదా అనే విషయం ఇంకా తెలియాల్సి ఉంది.
ఇక రామ్ చరణ్ తన 18వ సినిమా 'ఆర్ఆర్ఆర్' ప్రొడక్షన్ బ్యానర్ డీవీవీ ఎంటర్టైన్మెంట్స్లో రూపొందే అవకాశముందట. అయితే ఈ సినిమాకు కూడా ఎవరు డైరెక్టర్ అన్న విషయంపై క్లారిటీ లేదు. ఇలా ప్రస్తుతం చెర్రీ చేతి నిండా సినిమాలతో బిజీ కానున్నారు. 'ఆర్ఆర్ఆర్' తర్వాత రామ్ చరణ్ అంతర్జాతీయ స్థాయిలో పాపులర్ అయిపోయారు. అభిమానులు సైతం ఆయన ఇకపై ఎటువంటి సినిమాలు తీయనున్నారన్న విషయంపై ఆసక్తి కనబరుస్తున్నారు. ఈ క్రమంలో చరణ్ లైనప్ కచ్చితంగా అందరిలోనూ ఆసక్తి రేపే అంశమే. ఆచార్య తర్వాత ఇన్ని సినిమాలకు సైన్ చేసిన రామ్ చరణ్ మరింత ఫేమస్ అవ్వడం ఖాయమని ఫ్యాన్స్ అంటున్నారు.
