Actress Ileana D Cruz Baby : గోవా బ్యూటీ ఇలియానా పండంటి మగ బిడ్డకు జన్మనిచ్చారు. ఆగస్టు 1న చిన్నారి జన్మిస్తే.. ఈ విషయాన్ని ఆమె తాజాగా సోషల్ మీడియా వేదికగా పంచుకున్నారు. సాధారణంగా చాలామంది సెలెబ్రిటీలు కొన్ని నెలలు గడిచే దాకా.. చిన్నారుల ముఖాన్ని బయటి ప్రపంచానికి చూపడానికి ఇష్టపడరు. కానీ ఇలియానా రీసెంట్ ఇన్స్టాగ్రామ్ పోస్ట్ చూస్తే.. ఆమె ఇందుకు భిన్నం అని అర్థం అవుతోంది. చిన్నారి ఫొటోను సోషల్ మీడియాలో షేర్ చేస్తూ.. అబ్బాయి ' కోవా ఫీనిక్స్ డోలన్' పేరును ప్రకటించారు.
"మా ప్రియమైన అబ్బాయికి ఈ ప్రపంచంలోకి స్వాగతం పలకడానికి ఎంత ఆనందంగా ఉన్నామో మాటల్లో చెప్పలేము" అని ఇలియానా ఇన్స్టాగ్రామ్లో రాసుకొచ్చారు. 'దేవదాస్' సినిమాతో తెలుగు ప్రేక్షకులకు పరిచయమయ్యారు ఇలియానా. తర్వాత 'పోకిరి' సినిమాతో కుర్రాళ్ల హృదయాలను కొల్లగొట్టారు. తెలుగులో స్టార్ హీరోల సరసన నటించిన ఈ గోవా బ్యూటీ.. మెల్లిగా బాలీవుడ్ వైపు అడుగులు వేశారు. అక్కడ కూడా అగ్ర కథానాయకులతో స్క్రీన్ షేర్ చేసుకున్నారు ఇలియానా.
అయితే రెండేళ్లుగా సినిమాలకు దూరంగా ఉంటున్న ఈ భామ.. కొన్ని నెలల కిందట ప్రెగ్నెన్సీ విషయాన్ని చెప్పి అందరికి షాక్ ఇచ్చింది. ఇక అప్పటినుంచి తన బేబీ బంప్ ఫొటోలను ఎప్పటికప్పుడు ఇన్స్టాగ్రామ్లో షేర్ చేస్తున్నారు. ఈ క్రమంలో రీసెంట్గా మరో పోస్ట్తో తనకు తొమ్మిదో నెల అంటూ చెప్పుకొచ్చారు ఇలియానా.
అయితే ప్రెగ్నెన్సీని బయటపెట్టిన ఇలియానా.. మొదట్లో తన ప్రియుడు ఎవరో అని మాత్రం చెప్పలేరు. కానీ బాలీవుడ్ హీరోయిన్ కత్రినా కైఫ్ సోదరుడే ఆమె ప్రియుడు అయ్యుంటాడని కొందరు నెటిజన్లు సోషల్ మీడియాలో అప్పట్లో కామెంట్లు పెట్టారు. కాగా గతనెలలో ఆమె 'డేట్‌ నైట్‌' అనే క్యాప్షన్‌తో తన ప్రియుడి ఫొటోలను మొదటిసారి ఇన్స్టాగ్రామ్ వేదికగా పంచుకున్నారు. కానీ అతడి పేరును మాత్రం వెల్లడించలేరు ఇలియానా. అయితే తాను నిస్సహాయ స్థితిలో ఉన్నప్పుడు అతడు ఎంతో ధైర్యాన్నిచ్చాడని.. ఎన్నో సందర్భాల్లో తనకు అండగా ఉండి కన్నీళ్లు తుడిచి నవ్వించాడని చెబుతూ ఇలియానా తన ప్రియుడిపై ప్రశంసల జల్లు కురిపించారు.
