కారును ఢీ కొట్టిన లారీ.. ఒకరు మృతి

స్నేహితులతో కలిసి పుట్టిన రోజు వేడుకలు జరుపుకున్న ఓ విద్యార్థికి అదే చివరి రోజు అయింది. సరదాగా మిత్రులతో చేసిన ప్రయాణం మృత్యమార్గానికి దారి తీసింది. కుమారుని కోసం ఎదురుచూస్తున్న తల్లిదండ్రులకు చివరి చూపులే మిగిలాయి. వారు ప్రయాణిస్తున్న కారుకు లారీ యమపాశంలా తగిలింది. ఈ ఘటన కరీంనగర్ జిల్లా హుజురాబాద్​లో జరిగింది.

కారును లారీ ఢీ కొన్న ఘటనలో ఒక విద్యార్థి మృతి చెందగా మరో నలుగురికి తీవ్ర గాయలయ్యాయి. ఈ ప్రమాదం కరీంనగర్ జిల్లా హుజురాబాద్​ మండలం పరకాల క్రాస్​రోడ్​ వద్ద జరిగింది.

హుజూరాబాద్‌కు చెందిన రాజూరి మణిదీప్‌(22) తన పుట్టిన రోజు వేడుకలను స్నేహితులతో కలిసి జరుపుకున్నాడు. అనంతరం హుజురాబాద్​ నుంచి ఎల్కతుర్తి వెళ్తున్న క్రమంలో పరకాల క్రాస్ రోడ్డు వద్ద వారు ప్రయాణిస్తున్న కారును గుర్తు తెలియని లారీ ఢీ కొట్టింది. ఈ ప్రమాదంలో మణిదీప్​ అక్కడికక్కడే మృతి చెందగా అతని స్నేహితులు నలుగురికి తీవ్రగాయాలయ్యాయి. సంఘటనా స్థలానికి చేరుకున్న పోలీసులు క్షతగాత్రులను హన్మకొండలోని ఓ ప్రైవేటు ఆసుపత్రికి తరలించారు.

ఇదీ చదవండి: పథకం ప్రకారం హత్య.. భూవివాదాలే కారణం