Agricultural Co Operative Society Loans Fraud: మహబూబ్నగర్ జిల్లా గండీడ్ మండల ప్రాథమిక వ్యవసాయ సహకార సంఘానికి పంట రుణాలు బకాయిపడ్డ రైతుల జాబితా ఇటీవల బయటకు వచ్చింది. రెడ్డిపల్లి గ్రామంలో బకాయిపడ్డ రైతుల జాబితా అనుమానాలకు తావిస్తోంది. ఈ జాబితాలో 44వ క్రమసంఖ్యలో దోమ బాల్‌రెడ్డి అనే రైతు 2017లో 21వేల రుణం తీసుకుని వడ్డీతో సహా 36వేల240 రూపాయలు బకాయి పడ్డట్లు ఉంది. కానీ దోమ బాల్‌రెడ్డి 2013లోనే మృతి చెందారు. 2013లో చనిపోయిన ఆయన 2017 ఎలా రుణం తీసుకుంటారని కుటుంబ సభ్యులు ప్రశ్నిస్తున్నారు.
తన తండ్రి పేరిట మంజూరైన రుణం ఎవరు తీసుకున్నారని ఆయన కుమారుడు వాపోతున్నారు. కొంతమంది అమాయకులు, చనిపోయిన రైతుల పేరిట పంట రుణాలు మంజూరీ చేయించి.. ఆ సొమ్మును సొసైటీ సిబ్బందే కాజేశారనే ఆరోపణలు వెల్లువెత్తుతున్నాయి. ఒక్క రెడ్డిపల్లి గ్రామంలోనే సుమారు 13మంది చనిపోయిన రైతుల పేరిట 2017లో రుణాలు మంజూరైనట్లుగా జాబితా చెబుతోంది. తాము రుణాలు తీసుకోకపోయినా తీసుకున్నట్లుగా జాబితాలో ఉందని మరికొందరు రైతులు ఆరోపిస్తున్నారు.
"మా నాన్న పేరు నర్సింహులు 2015లో చనిపోయారు. సోసైటీలో లోన్ ఉన్నట్లు మాకు మెసేజ్ వచ్చింది. 2017లో మా నాన్న పేరు మీద లోన్ తీసుకున్నట్లు నోటీస్ వచ్చింది. మొత్తం 3 లక్షల 3వేలు అప్పు ఉన్నట్లు చూపిస్తోంది".-మహేష్,రెడ్డిపల్లి
చనిపోయిన వ్యక్తుల పేరిట రుణాలు: చనిపోయిన వ్యక్తుల పేరిట రుణమెలా తీసుకున్నారని కుటుంబ సభ్యులు సిబ్బందిని ప్రశ్నిస్తే బకాయిలు చెల్లించమని అడగటం లేదుగా అంటున్నారే తప్ప సరైన సమాధానం ఇవ్వడం లేదని రైతులు చెబుతున్నారు. రైతులు రుణాలు బకాయిపడితే సొసైటీ ఊరుకోదు. బకాయిలు చెల్లించాల్సిందిగా నోటీసులు జారీ చేస్తుంది. కానీ ఇన్నేళ్లు సొసైటీ సిబ్బంది బకాయిలు కట్టాలని అడగకపోవడం అనుమానాలకు తావిస్తోంది. రైతులకు తెలియకుండా వారి పేరు మీద సిబ్బందే రుణాలు కాజేశారని.. రుణమాఫీలో అవి మాఫీ కావడంతో వాటిని చెల్లించాల్సిన అవసరం లేదని చెబుతున్నారన్న విమర్శలు వినిపిస్తున్నాయి.
"మా నాన్న గారు ఎప్పుడో చనిపోయారు. కానీ మా నాన్న పేరు మీద ఇప్పుడు రుణం తీసుకున్నట్లు చూపిస్తోంది. అది నేను గట్టిగా ఆ ఆఫీసర్ను అడిగితే నేను మీకు డబ్బులు అడిగానా.. మీరు డబ్బులు చెల్లించకండి.. రుణమాఫీ వస్తుంది అంటున్నారు. అంటే మా పేరు మీద రుణం వస్తే వారు తీసుకుంటున్నారు. మాకు ఇవ్వడం లేదు".-గోవర్ధన్ రెడ్డి, రైతు
ప్రశ్నించిన వారిపై ఒత్తిడి: ఇలా రూ. 2కోట్లకుపైగా డబ్బులు కాజేసినట్లు ప్రచారం సాగుతోంది. వీరికి కొంతమంది ప్రజాప్రతినిధుల అండ ఉంటడంతో.. విషయం బయటకు రాకుండా.. ప్రశ్నించిన వారిపై ఒత్తిడి తెస్తున్నారని రైతులు ఆందోళన వ్యక్తం చేస్తున్నారు. దీనిపై సమగ్ర విచారణ జరపాలని కోరుతున్నారు. ఈ వ్యవహారంపై గండీడ్ ప్రాథమిక వ్యవసాయ సహకారం సంఘం సీఈఓ ఆశన్న వివరణ కోరగా.. బయటకు వచ్చిన జాబితా పాతదని చెబుతున్నారు.
చనిపోయిన రైతుల పేరిట రుణాలు ఇవ్వలేదని.. వారు సొసైటీకి ఎలాంటి బకాయి లేరని చెప్పారు. కావాలంటే వాళ్లందరికీ నోడ్యూ సర్టిఫికేట్లు సొసైటీ నుంచి జారీ చేస్తామని చెప్పారు. సొసైటీలో ఎలాంటి అక్రమాలు జరగలేదని స్పష్టం చేశారు. రైతులకే తెలియకుండా రుణాలు మంజూరు చేసి సొమ్మును సిబ్బందే కాజేయడంగా ఏళ్లుగా కొనసాగుతోందనే అనుమానాలు వ్యక్తమవుతున్నాయి. రుణమాఫీలో ఆ రుణాలు రద్దు కావడంతో అక్రమార్కులే లబ్ధి పొందుతున్నారని ఆరోపణలు వస్తున్నాయి.
"నాపేరు మీద 65 వేలు లోన్ తీసుకున్నట్లు.. వడ్డితో సహా 75వేలు కట్టమని ఇప్పుడు చూపిస్తోంది. కానీ మేము లోన్ తీసుకోలేదు. మేము గట్టిగా అడిగితే వారు ఒక్కటే చెబుతున్నారు. మేము డబ్బులు అడిగామా.. అని తప్పించుకొని తిరుగుతున్నారు. ఇక్కడ ఏం జరుగుతుందో తెలియడం లేదు".- చిన్న రాములు, రైతు రెడ్డిపల్లి
ఇవీ చదవండి:
