తిరుమల అగ్నిప్రమాద ఘటనలో ట్విస్ట్​

తిరుమలలో మంగళవారం జరిగిన అగ్నిప్రమాద ఘటనపై పోలీసుల విచారణ ముమ్మరం చేశారు. ఓ వ్యక్తి పెట్రోల్‌ పోసుకొని ఆత్మహత్యకు యత్నించడం వల్లే ఇతర దుకాణాలు దగ్ధమయ్యాయని వెల్లడించారు. పోస్టుమార్టం నివేదిక అనంతరం పూర్తి వివరాలు వెల్లడిస్తామని వెల్లడించారు.

తిరుమలలో మంగళవారం జరిగిన అగ్ని ప్రమాద దర్యాప్తులో పోలీసులు పురోగతి సాధించారు. ఘటనలో ఓ వ్యక్తి సజీవదహనమయ్యాడని తొలుత భావించినా.. అతనిది ఆత్మహత్యగా పోలీసులు తేల్చారు. దుకాణం నంబర్​.84 వద్ద పెట్రోల్‌ పోసి నిప్పంటించుకొని మల్లిరెడ్డి ఆత్మహత్య చేసుకున్నట్లు తెలిపారు. అందువల్లనే ఇతర దుకాణాలు దగ్ధమయ్యాయని పేర్కొన్నారు. పోస్టుమార్టం నివేదిక అనంతరం పూర్తివివరాలు వెల్లడిస్తామన్నారు.

ప్రమాదానికి కొంత సమయం ముందు తన ఫోన్‌ను మల్లిరెడ్డి స్నేహితునికి ఇచ్చాడు. ఈ ఫోన్​లో ఓ సెల్ఫీ వీడియోను పోలీసులు గుర్తించారు. కుటుంబ కలహాలు ఉన్నట్లు ఆ వీడియోలో మల్లిరెడ్డి ప్రస్తావించినట్లు పోలీసులు తెలిపారు. డబ్బాతో పెట్రోల్​ తీసుకెళ్తున్న దృశ్యాలు సీసీ కెమెరాల్లో నమోదయ్యాయి. మంగళవారం జరిగిన ఈ ఘటనలో 20 దుకాణాలు దగ్ధం కాగా.. 50 లక్షల రూపాయల ఆస్తి నష్టం జరిగింది.

ఇవీచూడండి: తిరుమలలో అగ్నిప్రమాదం.. ఒకరు సజీవదహనం