వికారాబాద్ పేలుడు.. భారీగా పేలుడు పదార్థాలు పట్టివేత

వికారాబాద్ జిల్లా పెద్దేముల్ మండల కేంద్రంలో ఆదివారం జరిగిన పేలుడు ఘటనతో పోలీసులు అప్రమత్తమయ్యారు. ప్రత్యేక బృందాలతో విస్తృత తనిఖీలు చేపట్టారు. ఈ క్రమంలో భారీ మొత్తంలో పేలుడు పదార్థాలను స్వాధీనం చేసుకున్నారు.

వికారాబాద్ జిల్లా పెద్దేముల్ మండల కేంద్రంలో ఆదివారం సంభవించిన పేలుడు ఘటనలో పోలీసులు పురోగతి సాధించారు. ముమ్మరంగా తనిఖీలు చేపట్టిన పోలీసులు... భారీ మొత్తంలో పేలుడు పదార్థాలను స్వాధీనం చేసుకున్నారు. నీటిపారుదల శాఖకు చెందిన పాత భవనంలో పోలీసులు సోమవారం విస్తృతంగా తనిఖీలు నిర్వహించారు.

విస్తృత తనిఖీలు

డీఎస్పీ లక్ష్మీనారాయణ, గ్రామీణ సీఐ జలంధర్ రెడ్డి, బాంబు డిస్పోజబుల్ బృందంతో పాటు పోలీసులు ఈ తనిఖీల్లో పాల్గొన్నారు. ఈ శిథిల భవనంలో గుర్తించిన పేలుడు పదార్థాలను పోలీసులు స్వాధీనం చేసుకొని పోలీస్ స్టేషన్‌కు తరలించారు. ఆ పరిసరాల్లోకి ఎవరినీ రానివ్వకుండా పోలీసులు నిలువరించారు.

ఇంటి ముందు పేలుడు

వికారాబాద్ జిల్లా పెద్దేముల్‌ మండల కేంద్రంలోని ఓ ఇంటి ముందు అనుమానాస్పద స్థితిలో పేలుడు సంభవించింది. ఈ ఘటనలో వెంకట్‌ అనే యువకుడికి తీవ్ర గాయాలయ్యాయి. విషయాన్ని గమనించిన స్థానికులు వెంటనే అతడిని తాండూరు ప్రభుత్వ ఆస్పత్రికి తరలించారు. స్థానికుల ద్వారా విషయం తెలుసుకున్న పోలీసులు ఘటనా స్థలానికి చేరుకొని విచారణ చేపట్టారు.

ఇదీ చదవండి: Explosion: వికారాబాద్ జిల్లాలో పేలుడు కలకలం... ఒకరికి తీవ్ర గాయాలు..