One Wife and Two Husbands News: పిల్లలను వదిలి వేరే వ్యక్తిని ప్రేమ పెళ్లి చేసుకున్న తల్లిని... ఇంటికి రమ్మంటూ కాళ్లు పట్టుకుని కూతురు విలపించిన ఘటన అందరినీ కలిచివేసింది. ఈ ఘటన హైదరాబాద్ ప్రెస్క్లబ్లో ఓ మీడియా సమావేశం సందర్భంగా చోటుచేసుకుంది. 20 ఏళ్ల క్రితం హనుమకొండకు చెందిన శశికాంత్తో కాజీపేటకు చెందిన మహిళకు వివాహం జరిగింది. వీరికి ఒక కుమారుడు, కుమార్తె ఉన్నారు. మహిళకు కొంతకాలం క్రితం ఫేస్బుక్ ద్వారా.. ఏపీలోని అమలాపురం కొత్తపేటకు చెందిన రాయుడు సత్యవరప్రసాద్తో పరిచయం ఏర్పడింది. ఈ క్రమంలో వారి పరిచయం కాస్త ప్రేమగా మారింది. దీంతో గత ఆగస్టు 20 న పుట్టింటికని వెళ్లిన మహిళ తిరిగిరాలేదు. ఇంట్లో ఉన్న బంగారు నగలు, 25 తులాల వెండి ఆభరణాలు, లక్ష నగదు కూడా మాయమవడంతో సుబేదారి పోలీసులకు భర్త ఫిర్యాదు చేశాడు. పోలీసుల దర్యాప్తులో మహిళ, సత్యవరప్రసాద్.. హైదరాబాద్లోని బల్కంపేట ప్రశాంత్ కాలనీలో సహజీవనం చేస్తున్నట్లు గుర్తించారు. ఇటీవల తూర్పుగోదావరి జిల్లాలో జరిగిన సామూహిక వివాహాల్లో వీరు పెళ్లి చేసుకున్నారు. ఎట్టకేలకు వీరి జాడ గుర్తించిన పోలీసులు అరెస్టు చేసి రిమాండుకు తరలించారు.
మహిళ ట్విస్టు
ఈ క్రమంలో ఇటీవల విడుదలైన ఆమె.. ఈరోజు ప్రెస్క్లబ్లో మీడియా ఎదుట మాట్లాడింది. శశికాంత్ తన భర్తే కాదని.. తన అక్క భర్త అని.. అక్క చనిపోతే పిల్లలను సాకానని చెబుతోంది. ఆ పిల్లలు తన పిల్లలు కాదంటూ మీడియా ఎదుట బుకాయించింది. 'మీరే నా పిల్లలైతే నన్ను పోలీసుస్టేషన్లో పోలీసులు చిత్రహింసలు పెడుతున్నప్పుడు ఎందుకు రాలేద'ని ఆగ్రహం వ్యక్తం చేసింది. ఈ క్రమంలో మీడియా ప్రతినిధులు అడిగిన ప్రశ్నలకు మహిళ సరైన సమాధానాలు చెప్పలేదు. 'పిల్లలతో నాకు సంబంధం లేద'ని తెగేసి చెప్పింది.
బోరున విలపించిన పిల్లలు
జైలు నుంచి విడుదలయ్యాక కూడా మహిళ, రెండో భర్త తమ బంధాన్ని కొనసాగించారు. ఈ క్రమంలో మొదటి భర్త.. తనకు విడాకులు ఇవ్వకుండా వాళ్ల రెండో పెళ్లి చెల్లదని పోలీసులను ఆశ్రయించారు. తన పిల్లల కోసమైనా ఆమెను తమ వద్దకు పంపాలంటూ ఎస్ఆర్నగర్ పోలీసులను శశికాంత్ కోరడంతో ఈ విషయంలో ఏమి చేయాలో తెలియక పోలీసులు తలలు పట్టుకున్నారు. అయితే జైలు నుంచి విడుదలయిన మహిళ.. పోలీసులు తనను వేధిస్తున్నారంటూ ఈ రోజు సోమాజిగూడ ప్రెస్క్లబ్లో మీడియా సమావేశం ఏర్పాటు చేసింది. ఈ విషయం తెలుసుకున్న మొదటి భర్త, కుమారుడు, కుమార్తె అక్కడికి చేరుకుని ఆమెను ఇంటికి రావాలంటూ బతిమిలాడారు. ఇంటికి రమ్మని కూతురు.. తల్లి కాళ్లు పట్టుకుంది. పిల్లలు బోరున విలపించినా ఆమె మనసు కరగలేదు. వారిని మానవత్వం మరిచి నెట్టివేసింది. 'మీతో నాకు ఎలాంటి సంబంధం లేదు' అని వారిని అక్కడి నుంచి నెట్టివేసింది. అంతే కాకుండా రెండో భర్త ఏకంగా వారిపై దాడికి కూడా దిగాడు.
ఇదీ చదవండి: father in law kills daughter in law: కోడలి గొంతు కోసి హత్య చేసిన మామ
