Mine Tragedey: ఓ వైపు భారీఎత్తున కూలిన బొగ్గు బండ శిథిలాలు.. ఎప్పుడు ఏ ప్రమాదం ముంచుకొస్తుందో తెలియని సంఘటన స్థలం.. ఏమాత్రం అజాగ్రత్త వహించినా బొగ్గు పొరల కింద ఉన్న వారికి ప్రమాదం.. దీంతో రెస్క్యూ సిబ్బంది ఆచితూచి ముందడుగు వేస్తున్నారు. మంగళవారం అర్ధరాత్రికే 36 గంటలు దాటింది.. సింగరేణి అడ్రియాల లాంగ్‌వాల్‌ ప్రాజెక్టు(ఏఎల్‌పీ) బొగ్గు గనిలో చిక్కుకున్న ఇద్దరి కార్మికుల ఆచూకీ లభించకపోవడంతో బాధిత కుటుంబ సభ్యులు, కార్మికుల్లో తీవ్ర ఉత్కంఠ నెలకొంది. భారీగా బొగ్గు బండలను తొలగించడానికి రెస్క్యూ సిబ్బంది నిరంతరంగా పనిచేస్తున్నారు. సోమవారం మధ్యాహ్నం గనిలోకి దిగిన సిబ్బంది ముగ్గురిని రక్షించగా, మరో ఇద్దరి ఆచూకీ కనిపెట్టేందుకు ముమ్మరంగా ప్రయత్నాలు చేస్తున్నారు. ఇప్పటికే జాడి వెంకటేశ్వర్లు, పిల్లి నరేశ్‌, ఎరవేణి రవీందర్‌లను సురక్షితంగా బయటకు తీసిన రెస్క్యూ సభ్యులు నాలుగు బృందాలుగా ఏర్పడి సహాయక చర్యలు కొనసాగిస్తున్నారు. నాలుగు షిఫ్టుల్లో పనిచేస్తున్న సిబ్బంది ఎంతో ఓర్పుతో ప్రయత్నాలను చేస్తున్నారు. మంగళవారం అర్ధరాత్రి అసిస్టెంట్ మేనేజర్‌ చైతన్యతేజ మృతదేహాన్ని గుర్తించగా, ప్రాంత రక్షణ అధికారి జయరాజ్‌, ఒప్పంద కార్మికుడు తోట శ్రీకాంత్‌లకు సంబంధించిన ఆచూకీ లభించలేదు. వారు ఎటువైపు ఉన్నారన్నది అంతు చిక్కడం లేదు.
మృత్యుంజయుడు రవీందర్
బొగ్గుగని మట్టి దిబ్బల నుంచి బయటపడి బదిలీ వర్కర్‌ రవీందర్ మృత్యుంజయుడిగా మిగిలాడు. కాలికి తీవ్రగాయమైనప్పటికి అతని ధైర్యాన్ని అభినందించారు. బొగ్గు పొరల్లో చిక్కుకుపోయిన నలుగురు కార్మికుల కోసం సహాయక బృందం పెద్ద యజ్ఞమే చేసింది. యంత్రాల ద్వారా సునాయాసంగా మట్టిని బొగ్గును తొలగించే భారీ యంత్రాలు అందుబాటులో ఉన్నాకార్మికుల ప్రాణాలను కాపాడటానికి గంటలకొద్ది శ్రమించారు.ఈనెల 7వతేదీ మధ్యాహ్నం ఒకటిన్నర ప్రాంతంలో గనిలోని సైడ్‌వాల్‌తో పాటు పైకప్పు కూలడంతో కార్మికులు అందులో కూరుకు పోయారు. వారిని బయటికి తీయడానికిగాను ఒక్కో అంగుళం చొప్పున బొగ్గు మట్టిని తొలగించారు.భారీ శిథిలాల్లో తొలగించడానికి సహాయక బృందం చేసిన ప్రయత్నాలను పలువురు అభినందించారు.పూర్తిగా శిథిలాల్లో కూరుకు పోయిన రవిందర్‌కు ఒకవైపు ఆక్సిజన్‌ పంపిస్తూనే మరోవైపు అతనిని వెలికి తీసే ప్రయత్నం చేశారు.శిథిలాల్లో కూరుకు పోయినా ధైర్యాన్ని కోల్పోకుండా సహాయం చేయమంటూ అరుస్తూనే ఉన్నాడు. అతనిని దాదాపు 24గంటల తర్వాత శిథిలాల్లో నుంచి వెలికి తీశారు.అతను శిథిలాల్లో నుంచి బయటికి రాగానే తోటి కార్మికుల గురించి అధికారులు అడిగి తెలుసుకున్నారు.
గుహలా తవ్వుకుంటూ..
భారీఎత్తున కూలిన బొగ్గుబండ కింది భాగం నుంచి రెస్క్యూ సిబ్బంది తవ్వుకుంటూ వెళ్తున్నారు. పైబొగ్గు బండలు పడకుండా జాగ్రత్తలు తీసుకుంటూ చేతులతో బొగ్గు బండను తోడుతూ ముందుకెళ్తున్నారు. రామగుండం, మందమర్రి, భూపాలపల్లి రెస్క్యూ స్టేషన్‌లకు చెందిన 300 మంది సిబ్బంది సహాయక చర్యల్లో నిమగ్నమయ్యారు. ఎటు నుంచి ఏ ప్రమాదం ముంచుకొస్తుందో తెలియని పరిస్థితుల్లో సహాయక చర్యలను కొనసాగిస్తున్న సిబ్బంది ముందుగా వారు పనిచేస్తున్న ప్రాంతానికి రక్షణ కల్పించుకుంటూ ముందుకు సాగుతున్నారు.
ఎప్పటికి పూర్తయ్యేనో..
ప్రస్తుతం ముగ్గురి అన్వేషణకు చేపట్టిన సహాయక చర్యలు బుధవారం తెల్లవారుజాము వరకు కొనసాగే అవకాశం ఉంది. అప్పటివరకు కూడా ఆచూకీ లభిస్తుందా అన్న సందేహాలు వ్యక్తమవుతున్నాయి. ప్రస్తుతం రెస్క్యూ సిబ్బంది నిరంతరంగా పనిచేస్తున్నారు. అక్కడి పరిస్థితుల ఆధారంగా తెల్లవారుజాము వరకు కూడా వారిని గుర్తించే అవకాశం లేదన్న అభిప్రాయాలు వ్యక్తమవుతున్నాయి.
కుటుంబ సభ్యుల్లో ఉత్కంఠ
ఈ ఘటనలో ఆరుగురు ఉద్యోగులు చిక్కుకుపోగా ఇందులో నలుగురు సురక్షితంగా బయటపడటంతో వారి కుటుంబ సభ్యులు ఊపిరి పీల్చుకున్నారు. మిగిలిన ఇద్దరి ఉద్యోగుల ఆచూకీ లభ్యం కాకపోవడంతో ఆందోళన నెలకొంది. ప్రమాద విషయం తెలియగానే ఆయా ఉద్యోగుల కుటుంబ సభ్యులు గనిపైకి చేరుకుని తమ వారి కోసం వేయి కళ్లతో ఎదురుచూస్తున్నారు. ఘటన స్థలం నుంచి వచ్చిన కార్మికులతో తమ వారి పరిస్థితులపై ఉత్కంఠగా అడిగి తెలుసుకున్నారు.
ప్రమాదం ఎలా జరిగిందంటే..
బొగ్గుగనిలో సపోర్టుగా ఏర్పాటుచేసే పిల్లర్‌ తొలగించడంతో ప్రమాదం చోటుచేసుకుంది. గనుల్లో ఒత్తిడి తట్టుకునేందుకు బొగ్గు తవ్వే మార్గంలో పైకప్పునకు దన్నుగా పిల్లర్లను ఏర్పాటు చేస్తారు. అడ్రియాల గనిలో 86 నుంచి 87 లెవల్‌ వరకు ఉండాల్సిన మూడు పిల్లర్లలో.. మధ్యలో ఉన్నదాన్ని తొలగించారు. దీంతో పైకప్పు ఒత్తిడికి గురై 20 రోజుల క్రితం పడిపోయింది. కూలిన ప్రాంతాన్ని సరిచేసేందుకు పనులు చేపట్టిన కొద్ది గంటల్లోనే.. మళ్లీ కూలి సిబ్బందిపై పడటంతో ప్రమాదం చోటుచేసుకుంది. ప్రతిష్ఠాత్మకంగా చేపట్టిన అడ్రియాల గనిలో వరుస ప్రమాదాలు ఆందోళన కలిగిస్తున్నాయి. ఏడాదిన్నర క్రితం విషవాయువు రావడంతో అరికట్టేందుకు వెళ్లి ఐదుగురు రెస్క్యూ సిబ్బంది అస్వస్థతకు గురయ్యారు. అందులో ఒకరు మృతిచెందారు.
రెండు రోజులుగా ఇక్కడే..
సింగరేణి డైరెక్టర్లు బలరాం, చంద్రశేఖర్‌, సత్యనారాయణ రెండు రోజులుగా ఏఎల్‌పీలోనే ఉంటూ సహాయ చర్యలను ఎప్పటికప్పుడు పర్యవేక్షిస్తున్నారు. అలాగే ఏపీఏ జీఎం ఎన్‌వీకే శ్రీనివాస్‌, ఆర్జీ-3 జీఎం మనోహర్‌, ప్రాజెక్టు అధికారి నాగేశ్వర్‌రావు, మేనేజర్‌ బ్రహ్మాజీరావు సైతం ఘటనా స్థలంలోనే ఉంటూ సిబ్బందికి సూచనలు చేస్తున్నారు. ఘటనా స్థలాన్ని ఎమ్మెల్యేలు శ్రీధర్‌బాబు, కోరుకంటి చందర్‌ సందర్శించి సహాయ చర్యలను సమీక్షించారు. జడ్పీ ఛైర్మన్‌ పుట్ట మధుకర్‌తో పాటు కాంగ్రెస్‌ పార్టీ జిల్లా అధ్యక్షుడు ఈర్ల కొమురయ్యలతో పాటు పలువురు నాయకులు ఘటనా స్థలానికి చేరుకొని కార్మికుల పరిస్థితులపై ఆరా తీశారు.
సహాయక చర్యలపైనే దృష్టి
ప్రస్తుతం సహాయక చర్యలపైనే ప్రధానంగా దృష్టి సారించాం. ముగ్గురు కార్మికులను బయటకు తీశాం. మిగతా ఇద్దరి ఆచూకీ కోసం గాలిస్తున్నాం. బొగ్గుబండ కూలిన ప్రాంతంలో చాలా సున్నితంగా పనిచేయాల్సి వస్తుంది. ఎక్కడ ఎవరు చిక్కుకున్నారో తెలియదు. యంత్రాలను వినియోగించి పనులు చేపడితే అందులో చిక్కుకున్న వారికి నష్టం వాటిల్లే ప్రమాదం ఉంది. అందుకే ఆచితూచి పనులు చేపడుతున్నాం. -బలరాం, సింగరేణి సంచాలకులు
ఇదీ చదవండి:
