Constable attempted Robbery: దొంగలను అరెస్టు చేయాల్సిన పోలీసే... దొంగతనానికి యత్నించిన ఘటన హైదరాబాద్లోని గచ్చిబౌలి పోలీస్స్టేషన్ పరిధిలో జరిగింది. సూర్యపేట జిల్లా అనంతగిరి మండలం పాలవరానికి చెందిన కంటు రమేష్ కొంతకాలం క్రితం టీఎస్‌ఎస్‌పీ పోలీసు పటాలంలో కానిస్టేబుల్‌గా విధుల్లో చేరాడు. కాగా ఇతను పోలీసు శాఖకు ఎటువంటి సమాచారం లేకుండా పారిపోవడంతో 8 నెలలుగా విధుల్లో లేడు. అతను విధులకు హాజరుకాకపోవడంతో... అధికారులు సస్పెండ్‌ చేశారు.
దీంతో ఆర్థిక ఇబ్బందులు తాళలేక సోమవారం సాయంత్రం కొత్తగూడ జీహెచ్‌ఎంసీ పార్క్‌లో ఓ మహిళ వాకింగ్‌ చేస్తుండగా వెనుక నుంచి వెళ్లిన కానిస్టేబుల్‌ రమేష్ ఆమె మెడలో ఉన్న 9 తులాల బంగారు పుస్తెలతాడు లాక్కొని పారిపోయాడు. బాధితురాలు గట్టిగా కేకలు వేయడంతో అప్రమత్తమైన స్థానికులు వెంబడించి కొద్ది దూరంలో పట్టుకొని దేహశుద్ధి చేశారు. అనంతరం ఈ విషయమై గచ్చిబౌలి పోలీసులకు సమాచారం అందించారు. సంఘటనా స్థలానికి చేరుకున్న పోలీసులు స్నాచింగ్‌కు పాల్పడిన కానిస్టేబుల్‌ నుంచి పుస్తెలతాడు స్వాధీనం చేసుకొని మంగళవారం అతన్ని రిమాండ్‌కు తరలించారు.
ఇవీ చదవండి:
