Soldier Died After Exercise: వ్యాయామం చేసి ఇంటికి వచ్చిన కాసేపటికే ఓ జవాను కుప్పకూలి మృతి చెందిన విషాద ఘటన సికింద్రాబాద్ బోయిన్పల్లి పోలీస్ స్టేషన్ పరిధిలో చోటుచేసుకుంది. ఆర్మీలో లాన్స్ నాయక్ హోదాలో కొనసాగుతున్న కుమార్.. జిమ్లో వ్యాయామం చేసి ఇంటికి తిరిగివచ్చాక ఒక్కసారిగా కుప్పకూలి మృతి చెందారు. తమిళనాడులోని వేలూరు జిల్లా కరైకుడెం గ్రామానికి చెందిన వి. కుమార్(30).. ప్రస్తుతం నగరంలో నివాసం ఉంటున్నారు. న్యూ బోయిన్పల్లి ఓల్డ్ ఎయిర్పోర్టు రోడ్డులోని క్వార్టర్స్లో భార్య రఘుప్రియ, మూడేళ్ల కుమార్తెతో కలిసి జీవనం సాగిస్తున్నట్లు పోలీసులు తెలిపారు.
ఏఓసీ సెంటర్లో లాన్స్ నాయక్ హోదాలో విధులు నిర్వర్తిస్తున్న కుమార్.. తరచూ వెయిట్ లిఫ్టింగ్ పోటీల్లో పాల్గొంటుంటారు. రోజూలాగే ఈనెల 6 న సాయంత్రం ఏఓసీ సెంటర్లోని జిమ్కు వెళ్లి వ్యాయామం చేసి ఇంటికి తిరిగివచ్చారు. అనంతరం కుర్చీలో కూర్చున్నారు. ఆ కాసేపటికి కుమార్ భార్య రఘుప్రియ.. మంచినీళ్లు తేవాలా అని అడగడంతో.. కుర్చీలో కూర్చున్న కుమార్ పైకిలేచి ఒక్కసారిగా కుప్పకూలారు.
దీంతో అప్రమత్తమైన రఘుప్రియ.. హుటాహుటిన స్థానికుల సహాయంతో సమీపంలోని ఓ ప్రైవేటు ఆస్పత్రికి తరలించారు. అక్కడినుంచి తిరుమలగిరిలోని మిలిటరీ ఆస్పత్రికి తరలించగా కుమార్.. అప్పటికే మృతిచెందారని వైద్యులు నిర్ధరించారు. రఘుప్రియ ఫిర్యాదుమేరకు కేసు నమోదు చేసుకున్న పోలీసులు దర్యాప్తు చేస్తున్నారు.
ఇదీ చదవండి: ఆ తల్లిదండ్రులకు తీరని వేదన.. వేర్వేరు ఘటనల్లో ఇద్దరు చిన్నారులు మృతి
